އިންޑިއާއަށް ފިލަން ދިޔަ ކުރީގެ ނައިބު ރައީސް އަހުމަދު އަދީބު ދިރިއުޅޭ ގެއަށް ފުލުހުން ވަދެ ބަލާ ފާސްކުރަން ފަށައިފި އެވެ.
މައުލޫމާތު ލިބިފައިވާ ގޮތުގައި އަދީބުގެ ދެކަނބަލުން ދިރިއުޅުއްވާ ގ. ހުމަށީގެ ނުވަވަނަ ފަންގިފިލާއަށް ފުލުހުން ވަނީ ކުރިމިނަލް ކޯޓުގެ އަމުރާއެކު އެވެ.
އެ ގެ ބަލާ ފާސްކުރަމުން ދަނީ އަދީބުގެ ގާނޫނީ ވަކީލުންގެ ހާޒިރުގަ އެވެ.
ގެ ބަލާ ފާސްކުރުމަށް ފުލުހުން ވަދެފައިވަނީ އަދީބު ފިލައިގެން އިންޑިއާއަށް ދިޔަ މައްސަލައާ ގުޅޭ ހެކި ހޯދުމަށެވެ.
މިހާރު އަދީބު ހުރީ ފުލުހުންގެ ބެލުމުގެ ދަށުގަ އެވެ. އޭނާ މިރޭގެ ވަގުތެއްގައި މާލެ ގެނެވޭނެ އެވެ. ގެންދަން ހަމަޖެހިފައިވަނީ ސީދާ ޖަލަށެވެ.
އަދީބު އިންޑިއާއަށް ދިޔުމަށްފަހު އެ ގައުމުގެ ސިޔާސީ ހިމާޔަތަށް އެދުނެވެ. ނަމަވެސް އެކަން ގަބޫލުނުކޮށް އިންޑިއާގެ ސިފައިން، އަދީބު ދިވެހި ފުލުހުންނާ ހަވާލުކުރީ އެވެ.
އަދީބު ދަތުރުކުރި ޓަގު ބޯޓަކީ އިންޑޮނޭޝިއާއަށް ހިލަ ބަރުކުރުމަށްފަހު އެނބުރި އިންޑިއާއަށް ދިޔަ މަގުމަތީ ރާއްޖޭގައި މަޑުކުރި ބޯޓެކެވެ. އެ ބޯޓުގައި އިންޑިއާގެ އެއް ފަޅުވެރިޔަކާއި އިންޑޮނޭޝިއާގެ އަށް ފަޅުވެރިޔަކު ތިއްބެވެ. އަދީބު އެ ބޯޓުގައި ހުރިކަން ފަޅާ އަރުވާލީ އިންޑިއާގެ ފަޅުވެރިޔާ އެވެ.
އިންޑިއާ ސިފައިން ވަނީ ޓުޓިކޮރިންގެ ބަނދަރު ބޭރުގައި ބޯޓު ބާއްވައިގެން އަދީބާ ސުވާލުކޮށްފަ އެވެ. އޭނާ އިންޑިއާއަށް އެރިޔަ ނުދިނެވެ.