ކުރީގެ ނައިބު ރައީސް އަހުމަދު އަދީބު ފިލައިގެން އިންޑިޔާއަށް ދިޔަ ޓަގު ބޯޓުގެ ކެޕްޓަން ފުރުން މަނާކޮށްފި އެވެ.
ފިލަން އުޅެނިކޮށް އަދީބު އަތުލައިގެންފައި ވަނީ "ވާގޯ 9" ނަމަކަށް ކިޔާ ޓަގު ބޯޓެއްގެ ފަޅުވެރިއަކަށް ހެދިގެން އިންޑިޔާގެ ޓުޓިކޮރިންއަށް އެތެރެވާން އުޅެނިކޮށް މި މަހުގެ އެއްވަނަ ދުވަހުގަ އެވެ. އެ މައްސަލާގައި ފުލުހުން ވަނީ އެ ބޯޓާ ގުޅޭ މައްސަލައެއް ތަހުގީގު ކުރުމަށް ބޯޓު ރާއްޖެ އައުމުން ހިފަހައްޓައިފަ އެވެ.
އެކަމާ ގުޅޭ ގޮތުން ފުލުހުން މިއަދު ބުނީ ޓަގު ބޯޓާ ގުޅޭ މައްސަލައެއް ތަހުގީގު ކުރަމުންދާތީ އެ ބޯޓުގެ ކެޕްޓަން ރާއްޖެއިން ފުރުން މަނާކޮށްފައިވާ ކަމަށެވެ. އިތުރު ތަފްސީލެއް ފުލުހުން ނުދެ އެވެ.
އަދީބު އިންޑިއާއަށް ގޮސްފައި ވަނީ އޭނާގެ މައްޗަށް މީގެ ކުރިން ކުރި ޖަލު ހުކުމްތައް ކޯޓުތަކުން ބާތިލްކޮށް އޭނާ މިނިވަންވެފައި ވަނިކޮށެވެ. އަދީބު މިހާރުވަނީ އަނބުރާ ރާއްޖެ ގެނެސް، ކޯޓު އަމުރެއްގެ ދަށުން ހައްޔަރުކޮށް 15 ދުވަހަށް ބަންދުކޮށްފަ އެވެ. ނަމަވެސް އޭނާ މިހާރު ވަނީ ޖަލުގައި އޮވެ ލިބުނު އަނިޔާއަކާ ގުޅިގެން ފަރުވާ ދިނުމަށް އައިޖީއެމްއެޗްއަށް ގެނެސްފަ އެވެ.