އެމްޑީޕީގެ ސަރުކާރުގެ ނައިބު ރައީސް މުހައްމަދު ވަހީދުގެ އަތްމައްޗަށް ވެރިކަން ފުރޮޅުމާ އެކު ކުރިމަތިވި ހާޖާނު ތަކުގައި ރާއްޖެ އާއި އިންޑިއާގެ ބަދަހި ގުޅުމަށް ހީނުކުރާ ވަރުގެ ދުރުކަމެއް އައެވެ. ރާއްޖޭގައި އޮތް އިންޑިއާގެ އެންމެ ބޮޑު އިންވެސްޓްމަންޓް، ޖީއެމްއާރު އެއާޕޯޓުން ނެރެ ފުރުވާލުމުން އިންޑިއާ އައީ އަމަށަކު ރުޅިއެއް ނޫނެވެ. ދޭން ހަމަޖެއްސި ލޯނުތައް ހިފަހައްޓާލައި ވިސާގެ ކަންކަމުގައި ދަތިކޮށް އިންތިހާއަށް ފިއްތާލި އެވެ. ސިޔާސީ ވަކި ކޮޅެއް ނަގައި، ޖެއްސުމަށް ކަން ކުރާ ގޮތަށް ވެސް އިންޑިއާގެ އަމަލުތައް ދިޔައީ ބަހައްޓަމުންނެވެ.
އެކަމުގައި ކިތަންމެ އުދާސް ބޮޑުވެފައި އޮތަސް ރާއްޖެ- އިންޑިއާގެ ގުޅުން ގޯސްވި ކަމަކަށް އެއްވެސް ގައުމަކުން އެއްބަހެއް ނުވެ އެވެ. ޑިޕްލޮމެސީގައި އެއީ އެކަން އޮންނާނެ ވެސް ގޮތެވެ. އެކަމަކު ފުރަގަހުން ދެ ގައުމުގެ ދެމެދުގައި އަރަމުން އައީ އަގުރު އަލިފާނެ އެވެ. ރިޔާސީ އިންތިހާބު ނިމި، ރައީސް އަބްދުﷲ ޔާމީނަށް ވެރިކަން ލިބުނު އިރުވެސް އެ ހާލަތަކަށް ބަދަލެއް ނާދެ އެވެ. ރައީސް ޔާމީނަށް ހާރިޖީ ގޮތުން ކުރިމަތިވެ ވަަޑައިގަތް އެންމެ ބޮޑު ޗެލެންޖަކީ ވެސް އިންޑިއާ މައިތިރިކުރުމެވެ.
ރައީސް ވެރިކަމަށް ވަޑައިގަތުމަށް ފަހު އެންމެ ފުރަތަމަ ބޭރު ގައުމަކަށް ރަސްމީ ދަތުރުފުޅެއް ކުރެއްވީ ވެސް އިންޑިއާއަށެވެ. އެ ދަތުރުފުޅުގެ މައިގަނޑު ބޭނުމަކަށް ވެފައި އޮތީ އިންޑިއާޔާ އެކު ގުޅުން ބަދަހި ކުރުމަށް ކަމަށް އޮތީ ދެ ގައުމުން ވެސް ހާމަކޮށްފަ އެވެ. ގިނަ ކަންކަމުން ގުޅުން ބަދަހި ކުރުމާ ގުޅޭ ގޮތުން ލައްކަ ގިނަ ވާހަަކަ ދެ ގައުމުން ދެއްކި އެެވެ. ރައީސް ޔާމީންގެ މިސްރާބު މިހުރީ ދިމާލަކީ ވަކި އިންޑިއާ ފެއަށް ޖައްސާފައި ކުރިއަށް ވަޑައިގަތުން ނޫންކަން މިކަމުން ހާމަވެ އެވެ.
"ރާއްޖޭގެ އަވަށްޓެރި އިންޑިއާއަށް ނޫނީ އެހެން ގައުމަކަށް ވެސް ނުރައްކަލެއްގެ ގޮތުގައި އޮންނާކަށް ރާއްޖެ ބޭނުމެއް ނުވޭ. އެއްވެސް ކަމެއްގައި އަވަށްޓެރި ގައުމުތަކުގެ މަސްލަހަތަށް ގެއްލުންވާ ގޮތަށް އެއްވެސް ކަމެއް ނުކުރާނަން،" ނައިބު ރައީސް އަހުމަދު އަދީބު ދަ ހިންދޫއަށް ދެއްވި އިންޓަވިއުއެއްގައި ވިދާޅުވެފައިވެ އެވެ.
ނައިބު ރައީސް އިތުރަށް ކަށަވަރުކޮށްދެއްވާ ގޮތުގައި ރާއްޖެއިން އަންނަނީ އިންޑިއާޔާ އެކު ގުޅުން ރަނގަޅު ކުރުމަށް މަސައްކަތްތަކެއް ކުރަމުންނެވެ. އެ ގައުމުގެ ބޮޑު ވަޒީރު ނަރެންދުރަ މޯދީ ރާއްޖެއަށް ދަތުރެއް ކުރެއްވޭނެ ފަދަ ފަހި މާހައުލެއް ބޭއްވުމަށް ސަރުކާރުގެ މިސްރާބު ހުރި ކަން އެ ފަހަރު ނައިބު ރައީސް ވަނީ ކަށަވަރު ކޮށްދެއްވައިފަ އެވެ.
އޭގެ ހަފްތާއެއްހާ ދުވަސް ފަހުން މޯދީގެ ހާއްސަ މަންދޫބެއްގެ ގޮތުން މި ހަފްތާ އިންޑިއާގެ ފޮރިން ސެކްރެޓަރީ، ސުބްރަމާނިޔަމް ޖަޔަޝަންކަރު ވަނީ ރާއްޖެ ވަޑައިގެންފަ އެވެ. އޭނާގެ ދަތުރުގައި ދެ ގައުމުގެ ގުޅުންތައް ވަރުގަދަ ކުރުމަށް ވަނީ ނައިބު ރައީސް އާއި ފޮރިން މިނިސްޓަރާ އެކު ވެސް މަޝްވަރާތައް ކުރައްވައިފަ އެވެ. އެ މަޝްވަރާތަކުގައި ފޮރިން ސެކްރެޓަރީ ވިދާޅުވެފައި ވަނީ އިންޑިއާ އޮތީ ރާއްޖޭގެ ކޮންމެ ކަމެއްގައި ވެސް އެހީތެރިވެ އެއްބާރުލުމަށް ކަމަށެވެ. ނައިބު ރައީސް ދަ ހިންދޫއަށް ދެއްވި އިންޓަވިއުގައި ވެސް ވިދާޅުވެފައިވާ ގޮތުގައި އިންޑިއާގެ ފޮރިން ސެކްރެޓަރީ ރާއްޖެ ވަޑައިގަންނަވާ ދަތުރުފުޅުގައި މޯދީގެ ދަތުރުފުޅެއް ރާއްޖެއަށް ކުރެއްވުމާ ގުޅޭ ކަންކަމުގައި މަޝްވަރާ ކުރާނެ އެވެ.
އިންޑިއާއިން އަބަދުވެސް ވާދަޖަހާ ޗައިނާއާ އެކު ރާއްޖެއިން މާ ގާތްގުޅުންތަކެއް ބާއްވާ ކަމަށް ބުނެ، އިންޑިއާގެ މީޑިއާތަކުން އަބަދުވެސް ކުރެވޭ ތުހުމަތުތައް ބޮޑެވެ. ބިން ވިއްކުމަށް ގާނޫނު އަސާސީއަށް ގެނައި އިސްލާހާ އެކު، އިންޑިއާގެ މީޑިއާތަކުން ވާހަކަ އަނބުރާލާފައި ވަނީ ރާއްޖޭގެ ފަޅުތަކެއް ޗައިނާއަށް ވިއްކަން އުޅޭ ކަމަށް ބުނެ އެވެ. އެ ތަންތަނުގައި ޗައިނާ އިން ހަދާނީ އިންޑިއާ ކަނޑަށް އަސްކަރީ ހަން ފެތުރުމުގެ މަރުކަޒުތަކެއް ކަމަށް މިހާރު ވެސް އޮތީ ލަފާކޮށްފަ އެވެ.
އެ ހުރިހާ އަޑުތަކާ އެކު ސަރުކާރުން މި ވަނީ އިންޑިއާޔާ އެކު ގުޅުން ބަދަހި ކުރުމުގެ މަސައްކަތްތަކެއް ކުރިއަށް ޖައްސާލައިފަ އެވެ. އިންޑިއާގެ ފޮރިން ސެކްރެޓަރީގެ ދަތުރަށް ފަހު ރާއްޖޭގެ ފޮރިން ސެކްރެޓަރީ، އަލީ ނަސީރު މި ވަނީ އިއްޔެ މަޝްވަރާތަކަށް ނިއުދިއްލީއަށް ވަޑައިގެންފަ އެވެ. ފޮރިން މިނިސްޓްރީ އިން އެ ދަތުރުގެ މާ ބޮޑު މައުލޫމާތުތަކެއް ނުދިނަސް، އެއީ ގުޅުން ބަދަހި ކުރުުމުގެ ދަތުރެއް ކަމަށް ހާރިޖިއްޔާ އިން މި ވަނީ ހާމަކޮށްފަ އެވެ.
ޑިޕްލޮމެސީގެ ދާއިރާގައި ގިނަ ދުވަސް ހޭދަކުރެއްވުމަށް ފަހު މިހާރު ރިޓަޔާ ކުރައްވާފައިވާ ބޭފުޅަކު ވިދާޅުވީ އިންޑިއާޔާ އެކު ގުޅުން ބަދަހި ކުރުމުގެ މަސައްކަތް ރާއްޖެއަށް މުހިންމުވެފައިވާ ކަމަށެވެ. އެއީ އޭނާ ވިދާޅުވި ގޮތުގައި އިންޑިއާޔާ ދުރުވެެގެން ރާއްޖެއަށް ކުރާނެ ފައިދާއެއް ޑިޕްލޮމެސީގެ ރޮގުގައި ނެތުމެވެ. އިންޑިއާޔާ ދުރުވެއްޖެ ނަމަ، ރާއްޖެއަށް ކުރިމަތިވެދާނެ ދުއްތުރާތައް ބޮޑު ކަމަށް އޭނާ ވިދާޅުވި އެވެ.
"އިންޑިއާޔާ ގުޅުން ބަދަހި ކުރުމަށް ފިޔަވަޅުތަކެއް އަޅާތަން އެބަ ފެނޭ. ކޮމްޕްރޮމައިޒްތަކެއް އެބަ އާދޭ. އެހެން ވީމާ މިއީ ރަނގަޅު ފާލެއް. ހާރިޖީ ބެލެންސް ކުރުމަކީ އަޅުގަނޑަށް ހީވަނީ ރާއްޖެ ފަދަ ކުޑަ ގައުމަކުން ކުރަން ޖެހޭ ކަމެއްހެން،" އެބޭފުޅާ ވިދާޅުވި އެވެ.
ސަރުކާރުން އަބަދުވެސް އެންމެ ރުޅިއަރާ ކަމަކީ ރާއްޖޭގެ ދާހިލީ މައްސަލަތަލުގެ ތެރެއަށް ވަންނަން ނުޖެހޭ ވަރަށް ބޭރުގެ ގައުމުތަކުން ވަދެ ގަތުމެވެ. މިހާރު މަންޒަރު ފެންނަ ގޮތުން އިންޑިއާ އިން ވެސް ފެންނަނީ އެ މައްސަލަތަކުގެ ތެރެއަށް ނުވަދެ، ހަމަ އެކަނި ބަލަން ތިބޭ ބައެއްގެ ގޮތުގަ އެވެ. މިސާލަކަށް ކުރީގެ ރައީސް މުހައްމަދު ނަޝީދު 13 އަހަރަށް ޖަލަށްލި މައްސަލައިގައި އިންޑިއާގެ ހަރުކަށި ރިއެކްޝަނެއް ނުފެނުނެވެ. އަދި ވެސް ކުރިމަތިވި ދާހިލީ ބައެއް މައްސަލަތަކުގައި އިންޑިއާ އިން މީގެ ކުރިން ވަކި ކޮޅެއް ނަގައިގެން، ބޮޑާ ހޭކި ގޮތަށް އުޅޭ ތަނެއް ނުފެނެ އެވެ.
ރާއްޖެއިން ވެސް ވަނީ އިންޑިއާގެ އިތުބާރު އުފެއްދުމަށް ގުރުބާނީތަކެއް ވެފަ އެވެ. އެޗްއައިވީ ލޭ އެޅުުނު މައްސަލައިގައި ހައްޔަރުވި އިންޑިއާ ރައްޔިތަކާއި ރާއްޖޭގެ ޖަލުގައި އެކި މައްސަލަ ތަކުގައި ހުކުމް ތަންފީޒު ކުރަމުން ދިޔަ އިންޑިއާގެ ދެ މީހަކު ވަނީ އެކަމުން ސަލާމަތްކޮށް އަނބުރާ އިންޑިއާއަށް ފޮނުވާލައިފަ އެވެ. މައްސަލަ ގަނޑެއްގެ ތެރޭގައި އޮތް ޓާޓާ ކުންފުނިން ހަދާ ފްލެޓްތަކުގެ މަސައްކަތް ކުރިއަށް ގެންދިޔުމަށް ސަރުކާރުން އޮތީ ހުއްދަ ވެސް ދޫކޮށްގެންނެވެ.
ކުރިން ރާއްޖޭގައި ހުންނެވި އިންޑިއާ ސަފީރު މުލޭއާ ހިލާފަށް މިހާރުގެ ސަފީރު ރަޖީވް ޝަހާރޭ ފެނިވަޑައިގަންނަވަނީ ސަރުކާރާ އެކީގައި މަސައްކަތް ކުރައްވާ މަންޒަރެކެވެ. ކަންކަން ބޮޑުކޮށްލުމުގެ ބަދަލުގައި އޭނާ ގެންގުޅުއްވަނީ މަޑުމައިތިރި ސިޔާސަތެކެވެ. އިންޑިއާ އިން ރާއްޖެއާ މެދު ނަގާފައިވާ މަޑުމައިތިރި ސިޔާސަތުގެ ބޭނުމަކީ އިތުބާރު އުފައްދައި ދެ ގައުމުގެ ދެމެދުގައި އޮތް ކުރީގެ ރަންގުޅުމަށް އިޔާދަވުން ދެވަނަ ކަމެއް ނޫނެވެ. ރާއްޖެއާ އިންޑިއާ އިން ކިތަންމެ ވަރަކަށް ކޯޅުނަސް، މި ދެ ގައުމުގެ ދެމެދުގައި އޮތީ ހިތާ ހިތުގެ ގުޅުމެއް ކަން ޔަގީނެވެ. މިހާރު މަންޒަރު މި ފެންނަ ގޮތުން، ދެ ގައުމުގެ ގުޅުމުގެ ރަންކުލަަތައް އިއާދަވުމުގެ ކޮޅުމަތި އެބަ ފެނެ އެވެ.