ޖުޑިޝަލް ކައުންސިލްގެ ބައްދަލުވުމުގައި ނިންމާ ނިންމުންތަކާ ގުޅިގެން އެ ބައްދަލުވުމުގައި ބައިވެރިވާ ފަނޑިޔާރުންގެ ސުލޫކީ މައްސަލަ ބަލާނެ ކަމުގެ އިންޒާރު ޖުޑިޝަލް ސާވިސް ކޮމިޝަން (ޖޭއެސްސީ) އިން ދީފި އެވެ.
ޖޭއެސްސީގެ ކުއްލި ބައްދަލުވުމެއް ވެސް މިރޭ ވަނީ ބާއްވާފަ އެވެ. އެ ބައްދަލުވުމުގައި ނިންމާފައިވަނީ ޖޭއެސްސީގެ ގާނޫނަށް ގެނެވުނު އިސްލާހަށް އަމަލު ނުކުރުމަށް ނުވަތަ އެ އިސްލާހުގެ ބާރު ކެނޑޭ ގޮތަށް ނުވަތަ ބަލައި ނުގަތުމަށް ޖުޑީޝަލް ކައުންސިލްގެ ބައްދަލުވުމުން ނިންމައިފިނަމަ، އެކަމުގައި ބައިވެރިވި ފަނޑިޔާރުންގެ ސުލޫކީ މައްސަލަ ބަލާނެ ކަމަށެވެ.
ޖުޑިޝަލް ކައުންސިލްގެ ބައްދަލުވުމެއް މިހާރު ދަނީ ކުރިއަށެވެ. އެއީ ޖޭއެސްސީގެ ގާނޫނަށް މިފަހުން ގެނައި އިސްލާހުތައް ބާތިލް ކުރުމާމެދު މަޝްވަރާ ކުރުމަށް ބާއްވާ ބައްދަލުވުމެއް ކަމަށްވެ އެވެ. މައުލޫމާތު ލިބޭ ގޮތުގައި މިރޭ ޖުޑިޝަލް ކައުންސިލުން ބާތިލް ކުރުމަށް މަޝްވަރާ ކުރާ އިސްލާހުތަކުގެ ތެރޭގައި އެ ޑީޖޭއޭ، ޖޭއެސްސީގެ ދަށަށް ގެންދިޔުމާއި ފަނޑިޔާރުންނަށް ފިޔަވަޅު އެޅޭނެ ގޮތްތައް ހިމެނެ އެވެ.
މީގެ ކުރިން ޑީޖޭއޭ އޮތީ ސުޕްރީމް ކޯޓުން އަމިއްލައަށް ނިންމި ނިންމުމެއްގެ ދަށުން އެ ކޯޓުގެ ދަށަށް ގެންގޮސްފަ އެވެ. ނަމަވެސް އެންމެ ފުރަތަމަ ގާނޫނު އަސާސީގެ ދަށުން ޖޭއެސްސީ ވުޖޫދުވެގެން އައިއިރު ވެސް ޑީޖޭއޭ އޮތީ ޖޭއެސްސީގެ ދަށުގަ އެވެ.
ޖުޑިޝަލް ކައުންސިލްގެ ބައްދަލުވުމެއް ބާއްވާއިރު ސުޕްރީމް ކޯޓުގެ ފަނޑިޔާރުންގެ މައްސަލަތައް ޖޭއެސްސީއިން ދަނީ ތަހުގީގު ކުރަމުންނެވެ. އެ ކައުންސިލްގައި ސުޕްރީމް ކޯޓުގެ ފަނޑިޔާރަކާއި ހައިކޯޓުގެ އިސް ފަނޑިޔާރާއި ސްޕީރިއާ ކޯޓުތަކުގެ އިސް ގާޒީންނާއި އުތުރާއި ދެކުނުން މެޖިސްޓްރޭޓަރަކު އިންނަވަ އެވެ.