ސައިކަލަކާއި ޕިކަޕާ ޖެހި ހިނގި އެކްސިޑެންޓަކާ ގުޅިގެން ހިނގި ހަމަނުޖެހުމެއްގައި ޕިކަޕް ޑްރައިވަރަށް މަރުގެ އިންޒާރު ދިން މައްސަލައެއް ބަލަން ފަށައި އިންޒާރު ދިން މީހަކު ހައްޔަރުކޮށްފި އެވެ.
ފުލުހުން ބުނި ގޮތުގައި މިއަދު އެ އެކްސިޑެންޓް ހިންގީ ހަވީރު ހަތަރެއް ޖަހާކަށް ހާއިރު ކަމަށާއި އެ އެކްސިޑެންޓާ ގުޅިގެން ޕިކަޕް ޑްރައިވަރަށް އިންޒާރު ދިނީ ސައިކަލު ފަހަތުގައި އިން 23 އަހަރުގެ ދިވެހި ފިރިހެނެއް ކަމަށެވެ. އޭނާ ޕިކަޕްގައި ފައިން ޖަހާފައިވެސްވާ ކަމަށާއި މިހާރު އޭނާ ހުރީ ފުލުހުންގެ ބެލުމުގެ ދަށުގައި ކަމަށް ފުލުހުން ބުންޏެވެ.
ސައިކަލު ދުއްވި 24 އަހަރުގެ ފިރިހެން މީހާއާއި ޕިކަޕް ޑްރައިވަރު އަތުގައި ވެސް ލައިސަންސް އޮތް ކަމަށް ފުލުހުން މައުލޫމާތު ދިނެވެ. ޕިކަޕް ޑްރައިވަރަކީ 57 އަހަރުގެ ދިވެހި ފިރިހެނެކެވެ.
މި އެކްސިޑެންޓްގައި އެއްވެސް އުޅަނދަކަށް ގެއްލުމެއް ލިބިފައިވާ ކަމެއް އަދި ސާފެއް ނުވެ އެވެ.
ފުލުހުން ދަނީ އެ މައްސަލަ އިތުރަށް ތަހުގީގު ކުރަމުންނެވެ.
