ރާއްޖޭގައި ރިސޯޓު ހަދަން ކުއްޔަށް ދޫކޮށްފައިވާ ތަންތަނުން ކުލީގެ ގޮތުގައި 1.3 ބިލިއަން ރުފިޔާ ލިބިފައިވާ ކަމަށް ފިނޭންސް މިނިސްޓްރީން ބުނެފި އެވެ.
ފިނޭންސް މިނިސްޓްރީން އާއްމުކޮށްފައިވާ ހަފުތާގެ މާލީ ރިޕޯޓުގައިވާ ގޮތުން، މި އަހަރުގެ ބަޖެޓުގައި ރިސޯޓުތަކުން ކުލީގެ ގޮތުގައި ލިބޭނެ ކަމަށް އަންދާޒާކޮށްފައިވަނީ 1.8 ބިލިއަން ރުފިޔާ އެވެ. ނަމަވެސް މި އަހަރު މިހާތަނަށް ލިބިފައިވަނީ 1.3 ބިލިއަން ރުފިޔާ އެވެ.
މި ރިޕޯޓުގައިވާ ގޮތުން މި މުއްދަތުގައި ޓޫރިޒަމް ޖީއެސްޓީގެ ގޮތުގައި 4.4 ބިލިއަން ރުފިޔާ ލިބިފައިވެ އެވެ. މި އަދަދަކީ ކުރިން ލިބޭނެ ކަމަށް އަންދާޒާކުރި ފަސް ބިލިއަން ރުފިޔާއާ އަޅާ ބަލާއިރު ދަށް އަދަދެކެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުގައި މި އަހަރުގެ މިހާތަނަށް ރާއްޖޭގައި 150 ރިސޯޓެއް ހިންގަމުންދެ އެވެ. އަދި މި އަހަރުގެ މިހާތަނަށް 20 ރިސޯޓެއް ރާއްޖޭގައި ހުޅުވާފައިވެ އެވެ.