ޑިޒައިން އެންޑް ބިލްޑް އުސޫލުން 36 މިލިއަން ރުފިޔާ އަށް ދ. މީދޫ ބަނދަރު ހަދަން ހަވާލުކޮށްފި އެވެ.
މީދޫ ބަނދަރު ހަދަން ހަވާލު ކުރީ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއެވެ. 408 ދުވަހުގެ ތެރޭގައި މި މަސައްކަތް ނިންމުމަށް މިއަދު ވަނީ އެއްބަސްވުމުގައި ސޮއި ކޮށްފަ އެވެ. މިއީ 36 މިލިއަން ރުފިޔާގެ މަޝްރޫއެކެވެ.
މި މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ؛
- 373 މީޓަރުގެ ބޮޑު ހިލައިގެ ބޭރު ތޮއްޓެއް ޖެހުން
- 35 މީޓަރު ރިވެޓްމަންޓު ޖެހުން
- 294 މީޓަރުގެ އެއްގަމު ތޮށި ޖެހުން
- ދެ ނެރުބައްތި އާއި 15 ބަނދަރު ބައްތި ޖެހުން
- 1470 ސްކޮޔާ މީޓަރު ޕޭމަންޓު
- ބަނދަރު ފުން ކުރުން، 15875 ކިއުބިކް މީޓަރަށް
- އެއް ރޭމްޕު
މި ކޮންޓްރެކްޓުގައި ޕްލޭނިން މިނިސްޓްރީގެ ފަރާތުން ސޮއި ކުރެއްވީ ޑިރެކްޓާ ޖެނެރަލް ޝާނާ ފާރޫގު އެވެ. އަދި އެމްޓީސީސީގެ ފަރާތުން ސޮއި ކުރެއްވީ ސީއޯއޯ ޝާހިދު ހުސައިން މޫސާ އެވެ.
މިދިޔަ މަހުވެސް ހަތް ރަށެއްގެ ބަނދަރުގެ މަޝްރޫއު އެމްޓީސީސީ އަށް ވަނީ ހަވާލުކޮށްފަ އެވެ. އެގޮތުން، ފަސް ރަށެއްގެ ބަނދަރު އަޕްގްރޭޑް ކޮށް ދެ ރަށެއްގެ ބަނދަރު ހަދަން ހަވާލު ކުރި އެވެ.
