ކުރީގެ ރައީސް މުހައްމަދު ނަޝީދު ގެންދަވަނީ ޝަހުސް އޮޅުވާލައްވައި އެހެން ޓްވިޓާ އެކައުންޓެއް މެދުވެރިކޮށް އިސްލާމް ދީނަށް ފުރައްސާރަކޮށް ހަޖޫ ޖަހަމުން ކަމަށް ތުހުމަތު ކުރައްވައި އެ މައްސަލަ ފުލުހަށް ހުށަހަޅުއްވާނެ ކަމަށް މާލެ ސިޓީގެ މޭޔަރު ކަމަށް ވާދަ ކުރައްވާ އަލްހާން ފަހުމީ މިއަދު ވިދާޅުވެއްޖެ އެވެ.
ރޮހިންޔާ މުސްލިމުންގެ ދިފާއުގައި ގެމްބިއާ އިން އދ. ގެ އެންމެ މަތީ ކޯޓު، އިންޓަނޭޝަނަލް ކޯޓް އޮފް ޖަސްޓިސް
(އައިސީޖީ) އަށް ހުށަހަޅާފައިވާ މައްސަލައަށް ރާއްޖޭން ތަދައްހުލުވެ ރާއްޖޭގެ ފަރާތުން ވަކާލާތު ކުރައްވާނެ ވަކީލެއްގެ ގޮތުގައި ބައިނަލްއަގްވާމީ ވަކީލު، އަމާލް ކްލޫނީ ވަނީ ހަމަޖައްސަވައިފަ އެވެ. އޭނާ މި މައްސަލާގައި ވާކާލަތު ކޮށް ދެނީ ގަޑި އިރަކަށް 30،000 ރުފިޔާގެ ފީއަކަށެވެ.
ރައީސް ނަޝީދުގެ ބައިނަލް އަގްވާމީ ގާނޫނީ ވަކީލުންގެ ޓީމުގައި ވެސް ހިމެނިވަޑައިގަންނަވާ އަމާލް ކްލޫނީ ރާއްޖޭގެ ފަރާތުން އެ މަސައްކަތް ކުރައްވާތީ އެ ކަމަށް ތައުރީފު ކުރައްވައި ނަޝީދު މިއަދު ވަނީ ޓްވީޓެއް ކުރައްވާފަ އެވެ. ނަޝީދު ވިދާޅުވި ގޮތުގައި ރޮހިންޖާ މައްސަލާގައި ރާއްޖޭން މަސައްކަތް ފެށީ ރާއްޖެއާ އެންމެ ގާތް މީހުނާ އެކުގަ އެވެ.
މިކަމާ ގުޅިގެން ކޮންމެ ވެސް ވަރަކަށް ރައީސް ނަޝީދަށް ފާޑުކިޔުންތައް ވެސް އަމާޒުވެގެން ދިޔަ އެވެ. ޓްވީޓާގައި ފާޑުކިޔަމުންދާ ބައެއް މީހުން ބުނަނީ މި މައްސަލައަށް ވާކާލާތު ކުރެވޭނެ ދިވެހި ވަކީލުން އެބަ ތިބި ކަމަށެވެ. އަދި އިންޑިއާގެ ކަޝްމީރުގައި ހިނގަމުންދާ ކަންކަމާ ގުޅިގެން މި ގޮތަށް އަމަލު ނުކުރާތީ ވެސް ބައެއް މީހުން ފާޑުކިޔާފައިވެ އެވެ.
މި ފާޑުކިޔުންތައް އަމާޒުވަމުން ދަނިކޮށް "އަލެކްސް އަހްމަދު" ނަމުގައި ފެންނަ ޓްވިޓާ އެކައުންޓަކުން ވަނީ ސަރުކާރުގެ ނިންމުން ދިފާއުކޮށް ޓްވީޓެއް ކޮށްފަ އެވެ. އެ އެކައުންޓުން ކުރި ޓްވީޓްގައި ބުނެފައި ވަނީ "ސިޔާސީ ބޭނުމަށް ހާލުގައި ޖެހިފައިވާ މުސްލިމުންގެ ފޮޓޯ ޖެހުމާއި ހުކުރު ދުވަހު ހޭރުމުގެ ބަދަލުގައި މާނަވީ ކަމެއް ސަރުކާރުން ކުރާ ކަމީ އުފަލެއް،" ކަމަށެވެ.
އެނގިފައިވާ ގޮތުގައި "އަލެކްސް އަހްމަދު" ގެ ނަމުގައި ހަދައިގެން އުޅޭ ފޭކް ޓްވީޓާ އެކައުންޓަކީ ރައީސް ނަޝީދު ބޭނުން ކުރައްވާ އެކައުންޓެކެވެ. އެކަމަކު މިހާތަނަށް ރައީސް ނަޝީދު އެ ކަމަށް އެއްބަސްވެވަޑައިގެންފައެއް ނުވެ އެވެ. އެކަމާ ގުޅޭ ގޮތުން ނޫސްވެރިން މިހާތަނަށް ކޮށްފައިވާ ސުވާލުތަކަށް ޖަވާބު ދެއްވަމުން އެކަން އެމަނިކުފާނު ސީދާ ދޮގު ކުރައްވާފައެއް ވެސް ނުވެ އެވެ.
އެ ޓްވީޓްގައި "ހުކުރު ދުވަހު ހޭރުން" ގޮތުގައި ސިފަކޮށްފައި ވަނީ ހުކުރު ދުވަހު މެންދުރުފަހު މުސްލިމު ފިރިހެނުން ކުރާ ނަމާދުގައި ދޭ ހުތުބާއަށް އިޝާރާތްކޮށް ކަމަށް ބުނެ ބައެއް މީހުން ދަނީ ރައީސް ނަޝީދަށް ފާޑު ކިޔުން އަމާޒު ކުރަމުންނެވެ.
އެ މައްސަލައާ ގުޅިގެން ކުރިން ރައީސް ނަޝީދާ އަރިސްކޮށް އުޅުއްވެވި އަލްހާން ކުރެއްވި ޓްވީޓެއްގައި ވިދާޅުވީ، ރައީސް ނަޝީދު ޝަހްސު އޮޅުވާލައްވައިގެން ދީނަށް ހަޖޫ ޖަހާ ކުރައްވާ ޓްވީޓްތައް ފުލުހުން ބަލައި ތަހުގީގު ކުރަން ޖެހޭ ކަމަށެވެ. އެއީ އެންމެން ވެސް ދަންނަ، ރައީސް ނަޝީދުގެ އެކައުންޓެއް ކަމަށާއި ފުލުހުންނަށް އެ މައްސަލަ އޭނާ ހުށަހަޅުއްވާނެ ކަމަށް ވެސް ވިދާޅުވި އެވެ.
"ރައީސް މުހައްމަދު ނަޝީދު ޝަހްސު އޮޅުވައިލެއްވުމުގައި ބޭނުން ކުރައްވަނީ އަމިއްލަފުޅު ޝަހްސު، ދީނަށް އިހާނެތި ބަސް ބުނުމަކީ ކުށެއް. މި މައްސަލަ ފުލުހުން ތަހުގީގު ނުކުރާ ނަމަ އަޅުގަނޑު މި މައްސަލަ ހުށަހަޅާނަން. މިއީ އަޅުގަނޑުގެ ވަރަށް ގިނަ ސަޕޯޓަރުންގެ އެދުމެއް." ކޮމިޝަނާ އޮފް ޕޮލިސް މުހައްމަދު ހަމީދު ވެސް ޓެގް ކުރައްވައި އަލްހާން ކުރެއްވި ޓްވީޓްގައި ލިޔުއްވާފައިވެ އެވެ.
ދީނަށް ފުރައްސާރަ ކުރުމާއި ރައީސް ނަޝީދާ ގުޅުވައި މީގެ ކުރިން ވެސް ސިޔާސީ އެކި ބޭފުޅުން އެކި ތުހުމަތުތައް ކުރައްވާފަ އެވެ. އެ ތުހުމަތުތައް ރައީސް ނަޝީދު ދޮގު ކުރައްވާއިރު، މިހާތަނަށް އެފަދަ އެއްވެސް މައްސަލައެއްގައި އެމަނިކުފާނަށް ފިޔަވަޅު އަޅާފައެއް ވެސް ނުވެ އެވެ.