ކޮރޯނާ ވައިރަހާ ގުޅިގެން ރާއްޖޭގައި މިހާރު އޮތް ހާލަތު ގޯސްވެއްޖެ ނަމަ، އެ ހާލަތަށް ތައްޔާރުވުމަށް ސްކޫލް ދަރިވަރުން ބޭނުން ކުރާނެ ހާއްސަ ސްކީމެއް އެކުލަވާލުމުގެ މަަސައްކަތް ފަށާފައިވާ ކަމަށް އެޑިއުކޭޝަން މިނިސްޓްރީން ބުނެފި އެވެ.
އެޑިއުކޭޝަން މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި، އެ މިނިސްޓްރީގެ ޑެޕިއުޓީ މިނިސްޓަރު މުހައްމަދު އިހުސާން ވިދާޅުވީ، ކިޔެވުން މެދުކަނޑާލާފައި އޮތް ހާލަތު ދިގުދެމިގެން ދާނަމަ، އެ ހާލަތަށް ތައްޔާރު ވުމަށް ދަރިވަރުންނަށް ހާއްސަ ސްކީމެއް އެކުލަވާލާނެ ކަމަށެވެ. އަދި މި މަސައްކަތް ކުރަނީ މި ހަފްތާ ތެރޭގައި މުދައްރިސުން ސްކޫލްތަކަށް ނިކުމެ ކަމަށް ވެސް ޑެޕިއުޓީ މިނިސްޓަރު ވިދާޅުވި އެވެ.
މިއީ ގްރޭޑް 10އަކުން ދަށް ގްރޭޑްތަކުގެ ދަރިވަރުންނަށް ހާއްސަ ކުރާ ސްކީމެކެވެ.
މި ސްކީމްގެ ދަށުން ދަރިވަރުންނަށް ކިޔަވައިދިނުމަށް ބޭނުންވާ ޑިޖިޓަލް ވަސީލަތްތައް ތައްޔާރު ކުރަމުން ގެންދާނެ އެވެ. އެ ވަސީލަތްތައް އެޑިއުކޭޝަނުން ހަމަޖައްސާފައި އޮތް ޕޯޓަލް މެދުވެރިކޮށް އަދި އޮންލައިންކޮށް ދަރިވަރުންނަށް ފޯރުކޮށްދެ އެވެ. މި ސްކީމްގެ ދަށުން ކިޔެވުމަށް ބޭނުންވާ އެކި ވަސީލަތްތައް ދެނީ ކޮންމެ މާއްދާއަކަށް ވަކިވަކިންނެވެ.
"މުދައްރިސުން ތައްޔާރުކުރާ ވަސީލަތްތައް އެޑިއުކޭޝަނުން ތައްޔާރުކޮށްފައި އޮތް ޕޯޓަލް މެދުވެރިކޮށް ދަރިވަރުންނަށް ލިބޭނެ، މުދައްރިސުންނަށް ބޭނުންވާ ޓެކްނިކަލް އެސިސްޓަންސް އާއި ގައިޑްވެސް އަޅުގަނޑުމެންގެ ޓެކްނިކަލް ބޭފުޅުން ފޯރުކޮށްދޭނެ،" ޑެޕިއުޓީ މިނިސްޓަރު ވިދާޅުވި އެވެ.
މީގެއިތުރަށް ސްކޫލަށް ޓީޗަރުން ނުގޮސް ގޭގައި ހުރެ މަސައްކަތް ކުރެވޭނެ އިންތިޒާމެއް ހަމަޖެއްސުމުގެ މަސައްކަތް ކުރަމުން އަންނަ ކަމަށް ވެސް ޕްރެސް ކޮންފަރެންސްގައި އެޑިއުކޭޝަން މިނިސްޓަރު ޑރ. އައިޝަތު އަލީ ވަނީ ފާހަގަކޮށްފަ އެވެ.
ސްކޫލްތައް ބަންދު ކުރުމުގެ ސަބަބުން، އެޑިއުކޭޝަން މިނިސްޓްރީން ވަނީ "ޓެލެކިލާސް"ގެ ނަމުގައި ޓީވީ މެދުވެރިކޮށް ގްރޭޑް 10އެއްގެ ދަރިވަރުންނަށް ކްލާސް ނަގައިދެމުންނެވެ. އެގޮތުން، ހެނދުނު 8 އިން މެންދުރު 2 އަށް މި ކްލާސްތައް ޕަބްލިކް ސާވިސް މީޑިއާގެ ޔެސް ޓީވީން ލައިވްކޮށްދައްކަ އެެވެ. ކޮންމެ ދުވަހެއްގެ ޓައިމް ޓޭބަލް އެޑިއުކޭޝަން މިނިސްޓްރީގެ ސޯޝަލް މިޑިއާ މެދުވެރިކޮށް އެއް ދުވަސް ކުރިން ހިއްސާ ކުރެ އެވެ.
ކޮރޯނާ ވައިރަހާ ގުޅިގެން ރާއްޖޭގެ ސްކޫލްތައް އެއް ހަފުތާއަށް ބަންދުކޮށްފައި ވަނީ ކުރިން އޮތް ހާލަތަށް ބެލުމަށްފަހު އެވެ. ނަމަވެސް މިހާރު ހާލަތު ބަދަލުވެ ރާއްޖޭގައި ވަނީ ސިއްހީ ކުއްލި ނުރައްކަލުގެ ހާލަތު އިއުލާން ކޮށްފަ އެވެ. އެ ހާލަތު އިއުލާން ކޮށްފައިވަނީ 30 ދުވަހުގެ މުއްދަތަށެވެ. ސިއްހީ ކުއްލި ނުރައްކަލުގެ ހާލަތުގައި އަޅާ ފިޔަވަޅެއްގެ ގޮތުން ސްކޫލްތައް ބަންދުކުރަން ޖެހެ އެވެ.