ރާއްޖޭގައި މިހާރު ކުރިއަށް ދާ އެންމެ ބޮޑު މަޝްރޫއަކީ، ވެލާނާ އިންޓަނޭޝަނަލް އެއާޕޯޓް (ވީއައިއޭ) ތަރައްގީ ކުރުމުގެ މަޝްރޫ އެެވެ. އެ މަޝްރޫއުގެ އެންމެ ބޮޑު ބަޔަކީ އާ އިންޓަނޭޝަނަލް ޕެސެންޖަރު ޓާމިނަލެވެ. އެ ޓާމިނަލްގެ މަސައްކަތް ކުރިއަށްދާ އިރު އެއާޕޯޓް ހިންގާ، އެމްއޭސީއެލުން މިވަނީ އާ ޓާމިނަލްގެ މަސައްކަތުގެ ފޮޓޯއެއް ދައްކާލާފަ އެވެ. އެ ފޮޓޯއާއެކު އެމްއޭސީއެލް އިން ބުނެފައި ވަނީ ޓާމިނަލްގެ މަސައްކަތް ކުރިން ވެސް ރޭވިފައިވާ ގޮތަށް 2022 ވަނަ އަހަރަށް ނިންމާލެވޭނެ ކަމަށެވެ.
"ލޮކްޑައުންގެ ތެރޭގައި ވެސް މަސައްކަތް ކުރިއަށް ގެންދޭ އެބަ. އެހެންވެ ޝެޑިއުލްކޮށްފައިވާ ތާރީހަށް ޓާމިނަލް ނިމޭނެ،" އެމްއޭސީއެލްގެ ޖެނެރަލް މެނޭޖަރު ހަސަން އަރީފު ވިދާޅުވި އެވެ.
ތިން ބުރިއަށް ހަދާ ބޮޑު މި އިމާރާތުގެ ފުރަތަމަ ޝީޓުގެ ބައިތަކެއްގައި ކޮންކްރީޓް މަސައްކަތ ވަނީ ނިންމާލާފަ އެވެ. އެމްއޭސީއެލް އިން ކުރިން ބުނެފައިވާ ގޮތުގައި ޓާމިނަލްގެ ބައެއް ބައިތައް ގެންނާނީ ރާއްޖެއިން ބޭރުންނެވެ.
މިހާރު ބޭނުން ކުރާ ޓާމިނަލާ އިންވެގެން ހަދާ އާ އިންޓަނޭޝަނަލް ޓާމިނަލްގެ މަސައްކަތް ހަވާލު ކޮށްފައި ވަނީ ސައުދީ އަރަބިއްޔާގެ ބިންލާދިން ކުންފުންޏަށެވެ. އެ ކުންފުންޏަށް އެ މަސައްކަތް ހަވާލު ރައީސް އަބްދުﷲ ޔާމީންގެ ވެރިކަމުގައި މެއި 21، 2016 އިގަ އެވެ. ނަމަވެސް ސަރުކާރު ބަދަލުވުމާއެކު ފަންޑިންގެ މައްސަލަތަކާއެކު މަޝްރޫއު ލަސްވުމަށް ފަހު މިހާރު މަސައްކަތް ހިނގަ އެވެ. މި މަސައްކަތް ކުރަމުން ގެންދަނީ ޗައިނާގެ ކުންފުނިންނެވެ. އާ ޓާމިނަލް އަޅަނީ 78،000 އަކަމީޓަރުގެ ސަރަހައްދެއްގަ އެވެ. ސަރުކާރުން ބުނެފައި ވަނީ އާ ޓާމިނަލް ނިމޭއިރު ދިވެހިވަންތަ ސިފަ ފެންނާނެ ކަމަށެވެ.
އަހަރަކު ގާތްގަނޑަކަށް ހަތް މިލިއަން މީހުންނަށް ހިދުމަތް ދެވޭ ފެންވަރަށް، ތަރައްގީ ކުރާ ޓާމިނަލްގެ މަަސައްކަތް ބިން ލާދިން ގްރޫޕާ ހަވާލު ކޮށްފައި ވަނީ 350 މިލިއަން ޑޮލަރަށް (5.3 ބިލިއަން ރުފިޔާ) އަށެވެ. އަދި މި މަސައްކަތަށް ހަރަދު ކުރަނީ ސައޫދީ އާއި އަބޫދާބީ އަދި ކުވެއިތު ފަންޑުން އުފައްދާފައިވާ ކޮންސޯޓިއަމްއަކުންނެވެ.
ވީއައިއޭ ތަރައްގީ ކުރުމުގެ މަޝްރޫއުގެ އަގު ގާތްގަނޑަކަށް 800 މިލިއަން ޑޮލަރު (12.3 ބިލިއަން ރުފިޔާ) އަށްވުރެ ބޮޑު ވާނެ ކަމަށް އަންދާޒާ ކުރެވެ އެވެ. މި މަޝްރޫއުގެ ދަށުން ވީއައިއޭގައި 3،400 މީޓަރު ދިގު ރަންވޭއެއް ވަނީ އަޅާފަ އެވެ. މި މަސައްކަތް ކޮށްފައިވަނީ ޗައިނާގެ، ބެއިޖިން އާބަން ކޮންސްޓްރަކްޝަން ގްރޫޕު (ބީޔޫސީޖީ) އާ ރަންވޭގެ އަގު 373 މިލިއަން ޑޮލަރު (5.7 ބިލިއަން ރުފިޔާ) އަށް އަރަ އެވެ. މީގެ އިތުރުން ކާގޯ ޓާމިނަލް އާއި ތެޔޮ ރައްކާ ކުރާ ނިޒާމުގެ މަސައްކަތް ވެސް ވަނީ ބޮޑުބައި ނިންމާފަ އެވެ.
