ފުލުހުންގެ ގާނޫނު އަލުން އެކުލަވައިލަން ޖެހޭ ސަބަބެއް ނެތް ކަމަށާ ސަރުކާރުން ރައްޔިތުންގެ މަޖިލީހަށް ހުށައަޅާފައިވާ ފުލުހުންގެ ހިދުމަތުގެ ބިލުން ފުލުހުންގެ މިނިވަންކަން ގެއްލި، ސިޔާސީ ވުމުގެ ބިރުބޮޑު ކަމަށް ކުރީގެ ހޯމް މިނިސްޓަރު ޑރ. މުހައްމަދު ޖަމީލް އަހުމަދު ވިދާޅުވެއްޖެ އެވެ.
ފުލުހުންގެ ހިދުމަތުގެ ބިލު މަޖިލީހަށް ހުށަހެޅެއްވީ ހެންވޭރު ހުޅަނގު ދާއިރާގެ މެމްބަރު ހަސަން ލަތީފެވެ.
ހޯމް މިނިސްޓަރުކަން ވެސް ކުރެއްވި ކުރީގެ ނާއިބު ރައީސް ޖަމީލް ވިދާޅުވީ ފުލުހުންގެ ގާނޫނު އަލުން އެކުލަވައިލަން ޖެހޭ ސަބަބެއް ނެތް ކަމަށެވެ. މިހާރު އޮތް ގާނޫނުގައި މައްސަލައެއް އުޅޭނަމަ އިސްލާހެއް ހުށައަޅައިގެން ހައްލު ހޯދޭނެ ކަމަށެވެ.
އަދި ރައްޔިތުންގެ މަޖިލީހަށް ހުށައަޅާފައިވާ ފުލުހުންގެ ހިދުމަތުގެ ބިލުން ފުލުހުންގެ މިނިވަންކަން ގެއްލި، ސިޔާސީ ވުމުގެ ބިރުބޮޑު ކަމަށް ވެސް އޭނާ ވިދާޅުވި އެވެ.
"ފުލުހުންގެ ގާނޫން އަލުން އެކުލަވާލަން ޖެހުނީ ކޮން ބޮޑު މައްސަލައެއް އޮވެގެންތޯ؟ ގޯސް ވަކި ކަމެއް އުޅޭނަމަ އިސްލާހު ހުށަހަޅައިގެން ހައްލު ހޯދޭނެ. މިހާރު މަޖިލީހުގައި އޮތް ބިލުގެ ސަބަބުން ފުލުހުންގެ މަސައްކަތަށް އިތުރު ލޭޔާތައް ލެވި، މިނިވަންކަން ގެއްލި، ސިޔާސީ ވުމުގެ ބިރު ބޮޑު." ޖަމީލް ވިދާޅުވި އެވެ.
ޖަމީލް ވިދާޅުވީ އެމްޑީޕީގެ އިސް ސަފުގައި ތިބީ އިތުބާރު ގެއްލިފައި ތިބި ލީޑަރުން ކަމަށާ އެ ބޭފުޅުންނަށް ފުލުހުންގެ ތެރޭގައި ހުރި މައްސަލަތައް ހައްލު ނުކުރެވޭނެ ކަމަށެވެ.
"މައްސަލަތައް ހައްލުވާނީ މުސާރަ، ގެދޮރުވެރިކަން ފަދަ އެހީތެރިކަން ފުލުހުންނަށް ދީގެން. ތަޅާނެ ކުދިންކޮޅެއް ހޯދި އަދި ފުލުހުންގެ މޫނަށް ކުޅުޖެހި ފަރާތްތަކާއި އިތުބާރު ގެއްލިފައިވާ ފަރާތްތައް ލީޑް ކުރަން ތިބިހާ ހިނދަކު ކަންތައް ހައްލެއް ނުވާނެ. މިހާރު މެމްބަރުންގެ މައްސަލަ ނުބެލޭނެ." އެމްޑީޕީއަށް ފާޑުވިދާޅުވަމުން ޖަމީލް ވިދާޅުވި އެވެ.
ފުލުހުންގެ ބިލާ ގުޅޭ ގިނަ ކަންބޮޑުވުންތަކެއް މަޖިލީހުގެ ބައެއް މެންބަރުން ގެންދަވަނީ ފާޅު ކުރައްވަމުންނެވެ.
އަދި ސަލަފްގެ ރައީސް ޝައިހް އަބްދުﷲ ވަނީ އެ ބިލަކީ ރާއްޖޭގެ ގައުމިއްޔަތު، ލާދީނިއްޔަތަށް އަނބުރާލަން ކުރާ މަަސައްކަތެއްގެ ފެށުމުގެ ގޮތުގައި ސިފަ ކުރައްވާފަ އެވެ.
"ފުލުހުންގެ މަސްއޫލިއްޔަތާއި ވާޖިބުތައް ކަނޑައެޅިގެންދާނޭ ގޮތަށް، އެމްޑީޕީ ސަރުކާރުގެ ފަރާތުން ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ހުށައަޅުއްވާފައިވާ އާ ބިލަކީ ރާއްޖޭގެ ގައުމިއްޔަތު، ލާދީނިއްޔަތަށް އަނބުރައިލުމަށް ކަޅިކުރެވޭ މަންތަރެއް ކަމުގައި ދެކެން،" ސަލަފްގެ ރައީސް ވިދާޅު ވިއެވެ.
އަބްދުﷲ ވަނީ އެކަމުގެ ބައެއް މިސާލުތައްވެސް ހިއްސާ ކުރައްވާފަ އެވެ. އެގޮތުން ފުލުހުންގެ މިހާރުގެ ހުވަ އާއި އާ ބިލްގައި ފުލުހުންގެ ހުވާގެ ގޮތުގައި އިބާރާތް ކޮށްފައިވާ އިބާރާތްތައް ތަފާތުކަން ފާހަގަ ކުރައްވާފަ އެވެ.