މަސްވެރިންނަށް ނުދީ ހުރި ފައިސާ އަންނަ ހަފުތާ ފައިސާ ދޫކުރަން ފަށާނެ ކަމަށް، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ބުނެފި އެވެ.
މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ ވިދާޅުވީ މަސްވެރިންނަށް އެންމެ ފަހުން ފައިސާ ދޫކޮށްފައި ވަނީ މި މަހުގެ ދެވަނަ ދުވަހު ކަމަށާ، އެ ފަހަރު 15 މިލިއަން ރުފިޔާއާ ކައިރި އަދަދެއް ދޫކޮށްފައި ވާނެ ކަމަށެވެ. އަދި ބާކީ 13 ދުވަހުގެ ފައިސާއަށް ނުދީ ހުރި 33 މިލިއަން ރުފިޔާ އަންނަ ހަފުތާ ދޫކުރަން ފަށާނެ ކަމަށް ވެސް އޭނާ ވިދާޅުވި އެވެ.
އޭނާ ވިދާޅުވި ގޮތުގައި ދުވާލެއްގެ މައްޗަށް 200 ޓަނުގެ މަސް ބާނާނަމަ އާއްމު ގޮތެއްގައި ދުވާލަކު މައްޗަށް ފަސް މިލިއަން ރުފިޔާ މިފްކޯ އިން މަސްވެރިންނަށް ދޫކުރާނެ ކަމަށެވެ.
"ފާއިތުވި ތިން އަހަރު ދުނިޔޭގެ ބާޒާރުގައި އަގުތައް ހުރީ އެއް އަގެއްގައި. އެހެންވެ ބޮޑެތި އަދަދު ތަކުން މަސް ގަންނައިރު ކޭޝް ފްލޯ މެނޭޖު ކުރަން ދަތި ތަކެއް ހުރޭ،" ފައުޒީ ވިދާޅުވި އެވެ.
އޭނާ ވިދާޅުވި ގޮތުގައި އެ ކުންފުންޏަށް ބޭންކް ތަކުން ދީފައިވާ "އޯވަޑްރާފްޓް" ތަކަށް ކުރިން ފައިސާ ދައްކަމުން ނުދިއުމުގެ ސަބަބުން އެ ލޯނަށް ބަދަލު ވެފައި ވެއެވެ. ނަަމަވެސް އެ ފައިސާ ދެއްކުމަށް ވެސް އިންތިޒާމެއްގެ ދަށުން މަސައްކަތް ފަށާފައިވާނެ އެވެ.
"އޯވަޑްރާފްޓް ފެސިލިޓީ ތަކަށް ވެސް ފައިސާ ދައްކަމުން މިދަނީ. ބޭންކް ތަކަށް މަހަކު 5.5 މިލިއަން ރުފިޔާ ވަރު ދައްކަން. މި ހުރިހާ ލޯނެއް 2021 ވަނަ އަހަރު އެއްކޮށް ދައްކާ ނިމޭނެ. އެހެންވެ ކުރިއަށް އޮތް ތާނގައި މަސް ގަންނަން ފަންޑެއް އޮންނާނެ،" ފައުޒީ ވިދާޅުވި އެވެ.
މިހާތަނަށް 500 މިލިއަން ރުފިޔާ ދޫކޮށްފި
ފައުޒީ ވިދާޅުވީ އެ ކުންފުނިން މިދިޔަ އަހަރު 48،000 ޓަނުގެ މަސް ކިރުވާފައިވާއިރު މަސްވެރިންނަށް 908 މިލިއަން ރުފިޔާ ދޫކޮށްފައި ވާނެ ކަމަށެވެ. އޭނާ ވިދާޅުވި ގޮތުގައި މިފްކޯގެ ކެޕޭސިޓީ އިތުރު ކުރަން މިހާރު ކުރަމުންދާ މަސައްކަތް ނިމުމުން މަސްވެރިންގެ ޝަކުވާ އަށް ލުއި ލިބިގެންދާނެ އެވެ.
"މިހާރު ވެސް މަސްވެރިކަން ރަނގަޅު. މިހާރު 300 ޓަނުގެ މަސް ކިރާނެ ކަމަށް. މިހާރުގެ މި މުއްދަތުގައި 18،000 ޓަނު ކަލެކްޓް ކުރެވި. ގާތްގަނޑަކަށް 500 މިލިއަން ރުފިޔާ ވަނީ ދޫކުރެވިފައި. މި ފެށޭ މަސްވެރި ކަމަށް ވެސް އަޅުގަނޑުމެން މިދަނީ ތައްޔާރު ވަމުން،" ފައުޒީ ވިދާޅުވި އެވެ.
އޭނާ ވިދާޅުވީ ޔޫރަޕް މާކެޓް ކޮންމެ ވެސް ވަރަކަށް ފްރީޒްވެ، ދަށްވެފައިވާ ކަމަށާ، ނަމަވެސް އެ ހުރިހާ ކަމެއް ގިރާކޮށް މަސްވެރިންނަށް ހިދުމަތް ދިނުމުގައި ދެމިތިބޭނެ ކަމަށެވެ.
މިފްކޯ އިން ދަނީ 30 ޑޮލަރުގެ މަޝްރޫއެއް ހިންގަން ތައްޔާރު ވަމުންނެވެ. މި މަޝްރޫއުގެ ދަށުން ކޫއްޑޫ އާއި ފެލިވަރުގައި ބާވެފައި ހުރި ވަސީލަތް ޒަމާނީ ވަސީލަތްތަކަށް ބަދަލު ކުރާނެ އެވެ.