އަންހެން ކުދިންނާއި އަންހެނުން ބާރުވެރިކުރުވުމުގެ ގޮތުން، އިސް މަގާމުތަކުގައި ތިބޭ އަންހެނުންގެ ނިސްބަތް އިތުރުކުރުމަށް ދަނީ މަސައްކަތް ކުރަމުން ކަމަށް ޖެންޑާ މިނިސްޓްރީން ބުނެފި އެވެ.
ކޮންމެ އަހަރެއްގެ އޮކްޓޫބަރު 11 އަކީ ބައިނަލްއަގުވާމީ ގޮތުން ފާހަގަ ކުރާ އަންހެން ކުދިންގެ ދުވަސް ނޫނީ 'އިންޓަނޭޝަނަލް ޑޭ އޮފް ދަ ގާލް ޗައިލްޑް" އެވެ. މި ދުވަސް ފާހަގަ ކުރަނީ ދުނިޔޭގެ އެކި ކަންކޮޅުގައި އަންހެން ކުދިންނަށް ދިމާވާ ގޮންޖެހުންތައް ދެނެގަނެ، އެކަމުން އަރައިގަތުމަށް އަންހެން ކުދިން ބާރުވެރިކުރުވައި، އެ ކުދިންގެ ހައްގުތައް ކުރިއަރުވައި، އަދި އެކުދިންނަށް އެހެން ކުދިންނެކޭވެސް އެއްހަމައެއްގައި ފުރުސަތު ހޯދައިދިނުމަށެވެ.
ދުވަހާ ގުޅުވައިގެން ޖެންޑާ މިނިސްޓްރީން މިއަދު ބުނީ، އަންހެން ކުދިންނާއި އަންހެނުން ބާރުވެރިކުރުވުމަށް މި ސަރުކާރުން މަސައްކަތްތަކެއް ކުރަމުން އަންނަ ކަމަށެވެ. އެގޮތުން، އަންހެން ކުދިން އެކުދިންގެ އަމިއްލަ ނަފްސާ މެދު ދެކޭގޮތް ހަރުދަނާކުރުމަށާއި، ކޮންމެ ކުއްޖަކީވެސް ގާބިލުކަން ހުރި ކުއްޖެއްކަމާއި، މާދާމާގެ އިސް މަޤާމުތަކުގައި އަންހެނުންގެ ނިސްބަތް އިތުރުކުރުމަށް މަސައްކަތް ކުރާ ކަމަށެވެ.
މީގެ އިތުރުން އަންހެން ކުދިންނަށް ކުރާ އަނިޔާ ހުއްޓުވުމަށް ކުރަންޖެހޭ މަސައްކަތްތަކަކީ ޖެންޑާ އިން އިސްކަންދީގެން ކުރަމުންދާނެ ކަމެއް ކަމުގެ ޔަގީންކަަން އަަރުވާ ކަމަށް އެ މިނިސްޓްރީން ނެރުނު ބަޔާނުގައިވެ އެވެ.
އަންހެން ކުދިންގެ ދުވަސް ފާހަގަކުރުމަށް އ.ދ އިން މިއަހަރު ކަނޑައަޅާފައިވާ ޝިއާރަކީ 'މައި ވޮއިސް، އަވާ އީކުއަލް ފިއުޗާ' އެވެ. ޝިއާރުގެ މަގްސަދަކީ އަންހެން ކުދިންގެ އަޑުއަހާއި ހަމަހަމަ ފުރުސަތުތައް ފޯރުކޮށްދިނުމަށް އެޅުމާއި ހެދޭ ސިޔާސަތުތަކަކީ ނަތީޖާގެ ހަމަހަމަކަން ލިބޭ ސިޔާސަތުތަކަށްވުމެވެ.