މާލެ ހުޅަނގު ދެކުނު ފަރާތުގައި އައިޖީއެމްއެޗްގެ ކައިރިން ފެށިގެން ސޯޝަލް ސެންޓަރުގެ ކަންމައްޗާ ހަމަޔަށް ތަރައްގީ ކުރާ ބީޗަކީ މޫދު ކުޅިވަރު ކުޅޭނެ ހާއްސަ ސަރަހައްދެއްވެސް ހިމެނޭ ގޮތަށް ތަރައްގީކުރާ ބީޗެކެވެ. އަލަށް ހަދާ އެ އާޓިފިޝަލް ބީޗަކީ މާލެ އަށް އަދި ރާއްޖޭގެ ތަރައްގީއަށް ވަރަށް މުހިއްމު މަސައްކަތެކެވެ. ހާއްސަކޮށް ގިނަ ބަޔަކު އުޅޭ ވެރިރަށް މާލޭގެ އިޖުތިމާއީ ތަރައްގީ އަށާއި ދުޅަހެޔޮ ކަމަށެވެ. އެހެންނަމަވެސް އެއީ ފާޑުކިޔުން ވެސް އަމާޒުވެފައިވާ ޕްރޮޖެކެޓެކެވެ. ބައެއް މީހުން ދެކޭ ގޮތުގައި އެއީ ބޭކާރު ޕްރޮޖެކްޓެކެވެ.
ގައުމެއް ތަރައްގީ ވަނީ އުމްރާނީ ތަރައްގީއާއި އެއްވަރަށް އިޖްތިމާއީ ދުޅަހެޔޮކަން ވެސް ހަރަދުކޮށްގެންނެވެ. ރައީސް އަބްދުﷲ ޔާމީން ވެރިކަމަށް ވަޑައިގެންނެވުމަށްފަހު ވިދާޅުވެފައި ވަނީ ކަންކަން ބައްޓަން ކުރައްވަނީ ތަރައްގީގެ މަސައްކަތްތަކުގައި ރައްޔިތުންގެ މަތިން ހަނދާން ނައްތާލާ ގޮތަކަށް ނޫނެވެ. މީހުނާއި އިޖްތިމާއީ ތަރައްގީއާއެކު އެވެ. ކަމަށާއި، އާ އާޓިފިޝަލް ބީޗް މަޝްރޫއަކީ އެ ވިސްނުމުގެ ތެރެއިން ރައީސް ޔާމީނުގެ އިސްނެންގެވުމާއެކު ފެއްޓެވި މަޝްރޫއެކެވެ.
އާ އާޓިފިޝަލް ބީޗް ހަދަނީ 41.5 މިލިއަން ރުފިޔާގެ ބޮޑު ބަޖެޓަކާއެކު އެވެ. އާ އާޓިފިޝަލް ބީޗުގެ މަސައްކަތް ސަރުކާރުން އިއުލާނު ކުރުމާއެކު މަސައްކަތަށް އަމާޒުވި ގިނަ ފާޑުކިޔުންތައް އޮތް އިރު ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވި ގޮތުގައި އެފަދަ ފާޑުކިޔުންތައް އަންނަނީ ވަކި ގޮތަކަށް ވިސްނުމާއި ނަޒަރު ބަދަލުކޮށްގެން ތިބެވޭތީ އެވެ. ގިނަ ފަހަރު ތަރައްގީ ސިފަވެފައި އޮންނަނީ ބަނދަރާއި، އިމާރާތްތަކާއި، ނަރުދަމާއާ ބްރިޖް ފަދަ މަޝްރޫއުތަކުން ކަމަށްވާތީ އެވެ.
"އުމްރާނީ ތަރައްގީ އާ އެއްވަރަށް އިޖްތިމާއީ ތަރައްގީ ވެސް އަންނަން ޖެހޭ. އިޖްތިމާއީ ދުޅަހެޔޮ ކަމަށް ހަރަދު ކުރަންޖެހޭނެ. ތެދު ވާހަކައެއް. ރަނގަޅުކޮށް ހައްލު ހޯދަންޖެހޭ މައްސަލަތައް ބައިވަރު އެބަހުރި. އިންސާނީ ބޭނުންތަކަކީ ކިތަންމެ ވަރަކަށް ފުއްދިޔަސް ކޮޅުންލާނެ ކަންތައްތަކެއް ނޫން. އެކަމަކު ލައްކައެއްހާ މީހުން އުޅޭ މާލޭގައި މީހުންގެ ހިތްހަމަޖެހުމަށް މިއީ [އާ އާޓިފިޝަލް ބީޗަކީ] ހަދަން ވަރަށް މުހިއްމު ތަނެއް،" މިނިސްޓަރު ވިދާޅުވި އެވެ.
މުއިއްޒު ވިދާޅުވި ގޮތުގައި ސަރުކާރަކުން ރައްޔިތުންނާއި ދޭތެރޭގައި ވިސްނާނަމަ ރައްޔިތުންގެ ހިތްހަމަޖެހުމާއި މުޖުތަމައުގެ އިޖްތިމާއީ ދުޅަހެޔޮކަމާއި ގުޅުންހުރި ކަންކަމަށް ހަރަދު ކުރާނެ އެވެ. އެހެންކަމުން އެކަމަށް ކިތަންމެ ބޮޑު ހަރަދެއް ހިނގި ކަމުގައި ވިޔަސް އެކަމަށް ބަލާކަށް ނުޖެހޭނެ އެވެ.
"ވިސްނާ ނަމަ ދެއްކޭނެ ބައިވަރު ވާހަކަ ހުންނާނެ. މާލޭގައި މީހުން ހިތް އުފާކޮށްލަން ދާނެ ގިނަ ތަންތަނެއް ނުހުރޭ. މިއީ ތޮއްޖެހިފައި އޮތް ތަނެއް. މިހާރު އޮތް ބީޗަކީ އެއްލައްކަ މީހުންގެ އާބާދީއަށް އެކަށޭނަ ޖާގަ އެއް ނޫން. އެހެންވީމަ ފައިސާ އަށްވުރެ ބޮޑަށް މި ކަމުން ލިބޭ ހިތްހަމަޖެހުމާއި، މީހުންގެ މެދުގައި އުފެދޭ އެއްބައިވަންތަކަމުގެ ގުޅުމަކީ މާ އަގުބޮޑު އެއްޗެއް،" މިނިސްޓަރު ވިދާޅުވި އެވެ. "ކަމެއް ކިތަންމެ ރަނގަޅަށް ކޮށްދިނަސް، އެކަމަށް ފާޑުކިޔައި ހާދާނެ. އެއީ ރަނގަޅު ކަމެއް ކަމަށް ގަބޫލު ކުރިޔަސް، ބޭރުފުށުން އެކަމަކަށް ނުރުހޭކަން ދައްކަން މަސައްކަތްކުރާ މީހުންނަކީ ވެސް ކޮންމެ މުޖުތަމައެއްގައިވެސް ތިބޭނެ ބައެއް،"