ވަގުތު އޮންލައިންގެ ނޫސްވެރިންނަށް އިންޒާރު ދެމުންދާތީ އެކަން ފުލުހުން ބަލަން ފަށައިފި އެވެ.
ފުލުހުން މިރޭ ބުނީ ވަގުތު އޮންލައިންއަށް އެކި ގޮތްގޮތުން އިންޒާރު ދެމުންދާ މައްސަލަ ފުލުހުން ތަހުގީގު ކުރަމުންދާ ކަމަށެވެ. މި މައްސަލަ ތަހުގީގު ކުރަމުންދާއިރު ވަގުތު ނޫހަށް ބޭނުންވާ ރައްކާތެރިކަަން ފުލުހުން ފޯރުކޮށް ދެމުންދާ ކަމަށްވެސް ބުންޏެވެ.
މީޑިއާގައި މަސައްކަތް ކުރާ މީހުންނަށްދޭ މިފަދަ އިންޒާރުތައް ފުލުހުން ވަނީ ހަރުކަށި އިބާރާތުން ކުށްވެރިކޮށްފައެވެ. އަދި މިފަދަ މައްސަލަތައް ހާއްސަ ސަމާލުކަމެއް ދީގެން ތަހުގީގުކޮށް ފިޔަވަޅު އަޅަމުން ގެންދާނެ ކަމުގެ ޔަގީންކަންވެސް ފުލުހުން މިރޭ ވަނީ ދީފައެވެ.
ވަގުތު އޮންލައިންގެ ނޫސްވެރިންނަށް އިންޒާރު ލިބެން ފެށީ ދާދި ފަހުން އެ ނޫހުގެ ނޫސްވެރިން އައްޑޫ ސިޓީއަށް ކުރި ދަތުރެއްގައި އެ ސިޓީގައި ހަރުކަށި ފިކުރުގެ މީހުން އުޅޭ ކަމަށް ބުނެ ލިޔުނު ރިޕޯޓަކާއި ގުޅިގެންނެވެ. އެ ރިޕޯޓްގައި އެ ސިޓީގެ އެކި ރަށްތަކުގައި އުޅޭ ހަރުކަށި ފިކުރު މީހުން ކަމަށް ބުނާ ބައެއް މީހުންގެ މައުލޫމާތު ގެނެސްފައިވެއެވެ. އެކަމާއި ގުޅޭ ވީޑިއޯ ރިޕޯޓެއްވެސް ވަނީ ގެނެސްދީފައެވެ. އެ ރިޕޯޓާއި ގުޅިގެން ސޯޝަލް މީޑިއާގައި އައްޑޫގެ ބައެއް ރައްޔިތުން ކަންބޮޑުވުން ފާޅުކޮށްފައިވާއިރު ބައެއް އެކައުންޓްތަކުން ވަނީ "ބަދަލު ހިފާނެ" ކަމަށް ބުނެ އިންޒާރުވެސް ދީފައެވެ.