"އިންސާފު ކޮބާ" ނަމުގައި އިދިކޮޅުން މާލެއާ އަތޮޅުތެރޭގައި ކުރިއަށް ގެންދިޔަ އިހުތިޖާޖުގެ ތެރެއިން މާލެއިން 11 މީހަކު ހައްޔަރުކޮށްފި އެވެ.
އިދިކޮޅު ދެ ޕާޓީގެ ލީޑާޝިޕްގެ އިސްވެރިންނާއި އާންމުން މިއަދު މަގުމައްޗަށް ނުކުމެ އިހުތިޖާޖު ކުރަން ފެށުމުން ފުލުހުން ވަނީ އެއްވުން ކުރިއަށް ނުގެންދެވޭނެ ކަމަށް އަންގާފަ އެވެ. ކޮވިޑްގެ ބަލިމަޑުކަމާއި ގުޅިގެން ރައްކާތެރިކަމުގެ ފިޔަވަޅެއްގެ ގޮތުން އެއްވުންތަކާއި ޖަލްސާތައް ބޭއްވުން ވަނީ މަނާ ކޮށްފަ އެވެ. އިދިކޮޅު އެއްވުމަށް ފުލުހުން ފުރުސަތު ނުދިނީ އެ ސަބަބާއި ގުޅިގެންނެވެ.
އެއްވުމުގެ ބައިވެރިން ހުއްޓުވާފައި ވަނީ ޕެޕާ ސްޕްރޭ ބޭނުން ކޮށްގެންނެވެ. ފުލުހުން މިއަދުު ވަނީ ވަރަށް ގިނަ ފަހަރު ގިނަ އަދަދަކަށް ޕެޕާސްޕްރޭ ބޭނުން ކޮށްފަ އެވެ. އެއްވުމުގެ ބައިވެރިވެރިންނަށް އަމާޒުކޮށް ޕެޕާ ސްޕްރޭ ބޭނުން ކުރުމުން ބައެއް މީހުންނަށް ވަނީ އަނިޔާވެސް ވެފައެވެ. އެކަކު ހޮސްޕިޓަލަށް ގެންގޮސް ފަރުވާ ދޭން ވެސް ޖެހުނެވެ.
މިއަދުގެ އެއްވުމުގެ ތެރެއިން 11 މީހަކު ވަނީ ހައްޔަރު ކޮށްފައި ވެއެވެ. އޭގެ ތެރޭގައި އިދިކޮޅު ދެ ޕާޓީގެ ކައުންސިލްގެ މެންބަރުން ވެސް ހިމެނެ އެވެ.
ޕްރޮގްރެސިވް ކޮންގްރެސް ކޯލިޝަނުން ބުނީ މިރޭވެސް އިހުތިޖާޖު ކުރިއަށް ގެންދާނެ ކަމަށެވެ.
