ވެލާނާ އިންޓަނޭޝަލަން އެއާޕޯޓް (ވީއައިއޭ)ގައި މާރާމާރީ ހިންގި ބިދޭސީއެއްގެ މައްސަލަ މޭމަހުގެ ކުރީކޮޅު ފެންމަތިވި އެވެ. މި މައްސަލައަކީ ރާއްޖޭން ފުރަން ގޮސް ހުރި ބިދޭސީއަކީ އެއާޕޯޓުގައި ދެ ދިވެހިންނަށް ހަމަލާދިން މައްސަލަ އެކެވެ.
އެއާޕޯޓް ޑިޕާޗަ ޓާމިނަލް ތެރޭގައި ހިނގި މި ހާދިސާގައި ދެ ދިވެހިންނަށް ހަމަލާދިނީ އެމެރިކާ މީހެއްކަން ފަހުން އެނގުނެވެ.
އެމީހާ ފުލުހުންގެ ބެލުމުގެ ދަށުން ކޯޓަށް ހާޒިރުކުރުމުން، ކުޑަމިނުން އޭނާ ބަންދުވެސް ނުކުރި އެވެ. އޭނާ ބަންދު ކުރަން ފުލުހުން އެދުނު ކަމެއްވެސް ހަގީގަތުގައި ނުވެސް އެނގެ އެވެ. އެކަމަކު އޭނާގެ ޕާސްޕޯޓް ހިފަހައްޓައި، އޭނާއާ ދެކޮޅަށް ދައުލަތުން ދެ ދައުވާއެއް އުފުލި އެވެ.
މިދިޔަ މެއި ހަތްވަނަ ދުވަހު ހެނދުނު އެއާޕޯޓުގައި ދެ ދިވެއްސަކަށް ހަމަލާ ދިނުމުގެ މައްސަލައިގައި އެމެރިކާ މީހާއާ ދެކޮޅަށް ދައުލަތުން އުފުލި ދެ ދައުވާއަކީ ގައިގައި އަތްލުމުގެ ކުށުގެ ދައުވާއާއި، އަނިޔާއެއް ދިނުމުގެ ކުށުގެ ދައުވާ އެވެ.
ދައުލަތުން މި ދެ ދައުވާ އެ މީހާއާ ދެކޮޅަށް އުފުލި ނަމަވެސް ދައުލަތުން އެ މިހާއާ އެކު ހެދީ ޑީލެކެވެ. "އިއުތިރާފުގެ އެއްބަސްވުން" މި ޑީލަކީ ގާނޫނީ ޑީލެކެވެ. މި ޑީލުގެ ދަށުން، ކުށްކުރި މީހާއަށް ލުއި އަދަބު ދެވޭނެ އެވެ. މި މައްސަލައިގައި ކަންވީވެސް އެހެންނެވެ.
ގައިގައި އަތްލުމުގެ ދައުވާގައިވެސް އަދި އަނިޔާއެއް ދިނުމުގެ ދައުވާގައިވެސް އެމެރިކާ މީހާއާ އެކު ދައުލަތުން ހެދި ޑީލުގެ ސަބަބުން އޭނާއަށް ލުއި އަދަބެއް ދޭން ނިންމީ އެވެ. ގައިގައި އަތްލުމުގެ ކުށުގެ މައްސަލައިގައި ހެދި ޑީލާއެކު، އެ މީހާގެ މައްޗަށް ކުރީ 3،600 ރުފިޔާގެ ޖޫރިމަނާގެ ހުކުމެވެ. އަދި އަނިޔާއެއް ދިނުމުގެ ކުށުގެ ދައުވާއާއެކު ހެދި ޑީލުން އެ މީހާގެ މައްޗަށް އައީ 7،200 ރުފިޔާގެ ހުކުމެކެވެ. ކުށުގެ އަދަބަކީ ޖުމްލަ 10،800 ރުފިޔާ ނުވަތަ 700 އެމެރިކާ ޑޮލަރުގެ ޑީލެކެވެ.
ދިވެހިރާއްޖޭގައި ދެ ދިވެއްސަކު އެ މީހުންގެ ރަސްމީ ޑިއުޓީގައި މަސައްކަތުގައި އުޅެނިކޮށް، ބިދޭސީއަކު އައިސް އެ ދެ މީހުންނާ ތަޅާ މާރާމާރީ ހިންގުމަށްފަހު އެކަން ނިންމާލީ އެންމެ 700 އެމެރިކާ ޑޮލަރުންނެވެ. އެއީ އަނިޔާ ލިބުނު ދެ ދިވެހިންގެ ތެރެއިން ކޮންމެ ދިވެއްސަކަށް 350 އެމެރިކާގެ ޑޮލަރުގެ އަގެކެވެ އެ މީހާ ރާއްޖެ ނާދެވޭ ގޮތަށް ޑީޕޯޓް ކުރި ކަމެއްވެސް އެނގޭކަށް ނެތެވެ. ދިވެހިންގެ ރާއްޖޭގައި ދިވެހިންގެ އަގަކީ މިއީ ހެއްޔެވެ؟