އުތުރުގެ ރަށެއްގައި، ފުލުހުންގެ ސައިކަލަކަށް ލައިގެން ޕޮލިސް ސްޓޭޝަނަށް ގެންދިޔަ މަގުމަތީ ސައިކަލުން ފުންމާލައިގެން ފިލި މީހަކާ އެކު ދައުލަތުން ނަސޭހަތުގެ އެއްބަސްވުމެއް ހަދައި މައްސަލަ ކޯޓުން ނަގައިފި އެވެ.
މި މައްސަލައިގައި ދައުލަތުން އެ މީހާގެ މައްޗަށް އެންމެ ފުރަތަމަ އުފުލާފައިވަނީ ގާނޫނު ތަންފީޒު ކުރާ މުވައްޒަފެއްގެ މަސައްކަތަށް ގަސްދުގައި ހުރަސް އެޅުމުގެ ދައުވާ އެވެ.
މައްސަލަ ދައުލަތުން ކޯޓަށް ހުށަހެޅީ މިދިޔަ އަހަރުގެ ޖުލައި މަހު އެވެ. މައްސަލަ ދައުލަތުން އެދިގެން ނެގީ މިދިޔަ ޖޫން މަހުގެ ފަހުކޮޅު އެވެ.
މި މައްސަލަ ނިމުނު ގޮތުގެ ރިޕޯޓުން އެނގޭ ގޮތުގައި މިއީ މިދިޔަ އަހަރުގެ ކުރީކޮޅު އެއްރެއެއްގެ ރޭގަނޑު މި މައްސަލައިގައި ހިމެނޭ މީހާ، ގެއަކަށް ވަދެ ވަޅިއެއް ހިފައިގެން އުޅުނު މައްސަލަ އެކެވެ.
މިމައްސަލައިގައި އޭނާ ހައްޔަރުކޮށް ޕޮލިސް ސްޓޭޝަނަށް ގެންދަންވެގެން ފުލުހަކު ދުއްވަމުން ދިޔަ ސައިކަލަށް އަރުވައިގެން ގެންދަނިކޮށް އޭނާ ވަނީ ސައިކަލުން ފުންމާލައިގެން ފިލާފަ އެވެ.
ދައުލަތުން މައްސަލަ އަނބުރާ ގެންދިޔައީ ޝަރީއަތް ފެށުމުގެ ކުރިން އެ މީހާއާ އެކު ހަދާފައިވާ ނަސޭހަތުގެ އެއްބަސްވުމެއްގެ ދަށުންނެވެ.
ނަސާތުގެ އެއްބަސްވުމަކީ ތަހުގީގުގައި ކުށަށް އިއުތިރާފުވާ މީހުންގެ ތެރެއިން އަލަށް ކުށްކުރާ މީހުންނާއި ނިސްބަތުން ކުދިކުދި ކުށް ކުރާ މީހުން އެފަދަ އަމަލުތަކުން ދުރުހެލިވުމަށް ބާރުއެޅުމުގެ ގޮތުން އަދި އެމީހުންނަށް އިތުރު ފުރުސަތުދީ މުޖުތަމައަށް ރުޖޫއަވެ، މުޖުތަމައުގައި ކުށުން ދުރުހެލިވެގެންވާ ރަނގަޅު ދިރިއުޅުމެއް އުޅުމަށް މަގުފަހިކޮށްދިނުމަށްޓަކައި، ޕްރޮސެކިއުޓާ ޖެނެރަލްއާއި ނަސޭހަތްދީ ދޫކޮށްލެވޭ މީހާއާ (ކުށުގައި ތުހުމަތުކުރެވޭ މީހާ)އާ ދެމެދު ވެވޭ އެއްބަސްވުމެކެވެ. މިގޮތަށް މައްސަލަ އަނބުރާ ގެންދާނީ އެއްބަސްވުމާ ހިލާފުވެއްޖެނަމަ އަލުން މައްސަލަ ކުރިއަށް ގެންދާ ގޮތަށެވެ.