އައްޑޫ ސިޓީ ހިތަދޫގެ ޓެކްސީ ޑްރައިވަރެއްގެ އަތާއި ބޮލުގައި ދަތް އެޅި މީހާ ހައްޔަރުކޮށްފި އެވެ. މި މައްސަލާގައި ހައްޔަރުކޮށްފައިވަނީ 29 އަހަރުގެ ދިވެހި ފިރިހެނެކެވެ.
ފުލުހުން ބުނީ ވިދާޅުވީ، ރޭ އައްޑޫގައި ހިނގި މި ހާދިސާއާ ގުޅިގެން ކޯޓު އަމުރެއްގެ ދަށުން 29 އަހަރުގެ ފިރިހެނަކު ހައްޔަރުކޮށްފައިވާ ކަމަށެވެ. މިމައްސަލާގައި ހައްޔަރުކޮށްފައިވާ މީހާއަކީ ގުރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގުމާއި ހަތިޔާރުން ބިރުދައްކައިގެން ފޭރުމާއި މަސްތުވާ ތަކެތީގެ ކުށުގެ ރެކޯޑް އޮންނަ މީހެއް ކަމަށް ފުލުހުން ބުނެ އެވެ.
ފުލުހުން ބުނީ އައްޑޫ ސިޓީގައި ޓެކްސީ ޑްރައިވަރެއްގެ އަތާއި ބޮލުގައި ދަތް އެޅި މައްސަލައެއް ރޭ 11:00 ޖަހާ އެހާކަންހާ އިރު ފުލުހުންނަށް ހުށަހަޅާފައިވާ ކަމަށެވެ. ފުލުހުން ދަނީ އެ މައްސަލަ ތަހުގީގު ކުރަމުންނެވެ.
މައުލޫމާތު ލިބޭ ގޮތުގައި ޓެކްސީ ޑުރައިވަރަށް ހަމަލާ ދީފައި ވަނީ ދަތުރެއްގައި އައްޑޫ ސިޓީގެ ހިތަދޫ ބޮޑު މަގުގައި ހުންނަ ފިހާރައެއްގެ ކުރިމަތީ ގޯޅީގައި މަޑުކޮށްގެން އޮއްވަ އެވެ. އަދި އެންމެ ފުރަތަމަ ހަމަލާ ދޭން އުޅުނީ ވަޅީއަކުން ކަމަށާއި އެހެން ނަމަވެސް އެކަން ކާމިޔާބު ނުވުމުން ޑުރައިވަރުގެ އަތާއި ބޮލުގައި ދަތް އެޅީ ކަމަށް މައުލޫމާތު ލިބެ އެވެ.