ދެކުނުގެ ރަށެއްގައި އާއިލީ ހަމަ ނުޖެހުމެއްގެ ތެރެއިން، ޅިޔަނަކަށް ބިރު ދައްކައި އަނިޔާ ކުރި މީހާ ބަންދުން ދޫކޮށްލައިފި އެވެ.
ރާއްޖޭގެ ދެކުނުގެ ރަށެއްގައި ހިނގި މި ހާދިސާއަކީ އާއިލީ މައްސަލައެއްގެ ތެރެއިން އުފަން ވެގެން އައި މައްސަލަ އެކެވެ.
މައްސަލަ ހޫނުވީ، ރަން ފަށެއްގެ މައްސަލައިގައި ކަމަށް މައުލޫމާތު ލިބެ އެވެ. މި މައްސަލައިގައި ދެ ޅިޔަނުން މާރާމާރީ ހިންގައި ތޫނު ހަތިޔާރުން ހަމަލާދީ އަދި އެކަކަށް ބޮޑެތި އަނިޔާތަކެއްވެސް ލިބިފައިވާ ކަމަށް މައުލޫމާތު ލިބިފައިވެ އެވެ.
އެހެންނަމަވެސް އާއިލީ ކަންތައްގަނޑެއްގެ ތެރެއިން އުފަން ވެގެން އައި މި މައްސަލައިގައި، އަނިޔާ ލިބުނު ފަރާތުން އަނިޔާ ކުރި ފަރާތާ ދެކޮޅަށް ދައުވާކުރަން ބޭނުން ނޫން ކަމަށް ބުނެފައިވާ ބުނުމަކީ މައްސަލައިގައި ޝާމިލުވާ މީހާ ދޫކޮށްލުމުގައި ކޯޓުން ރިއާޔަތް ކުރި އެއްކަމެވެ.
މި މައްސަލައިގައި ހިމެނޭ މީހާ އެންމެ ފުރަތަމަ ބަންދުކޮށް، ފަސް ދުވަހަށް މުއްދަތު ވެސް ޖެހި އެވެ. އެ މުއްދަތު ހަމަވެގެން، އަލުން ކޯޓަށް ހާޒިރުކުރުމުން އެ މީހާ ދޫކޮށްލީ އެއްވެސް ޝަރުތެއްވެސް ނެތި އެވެ.
އޭނާގެ އެއްވެސް ރެކޯޑެއްވެސް ނެތް ކަމަށް ފުލުހުންނާ ހަވާލާދީ ބަންދު އަމުރު ރިޕޯޓުގައި ބުނެފައިވެ އެވެ.
މައުލޫމާތު ލިބިފައިވާ ގޮތުގައި މި މައްސަލައިގައި ބަންދު ކުރި މީހާގެ އިގިއްޔަކަށްވެސް ސީރިއަސް އަނިޔާތަކެއް ވެފައިވެ އެވެ.