ރައްޔިތުންގެ މަޖިލީހުގެ މެންބަރުންގެ މުސާރަ ކުޑަކޮށްފިނަމަ އިންތިހާބަށް ނެގި ދަރަނި އަދާކުރާނެ ގޮތެއް ނޯންނާނެ ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އަދި މަޖިލީހުގެ މެޖޯރިޓީ ލީޑަރު އިބްރާހީމް ފަލާހު ވިދާޅުވެއްޖެ އެވެ.
މަޖިލިސް މެންބަރުންގެ މުސާރަ ކުޑަކޮށް އިނާޔަތްތައް ކަނޑާލަން ގޮވާލައި ސޮއިކުރަމުންދާ ޕެޓިޝަނާ ގުޅިގެން ފަލާހު އެކްސްގައި ކުރެއްވި ޕޯސްޓެއްގައި ވިދާޅުވީ މަޖިލިސް މެންބަރުންގެ މުސާރަ ކުޑަކުރުމަކީ ގޯސް ހިޔާލެއް ނޫން ކަމަށާއި ނަމަވެސް އެ ބަދަލު ގެންނަން އެންމެ ރަނގަޅީ މަޖިލީހުގެ ދައުރެއް ނިމި އާ ދައުރެއްގެ އިންތިހާބަށް ކަމަށެވެ.
"މަޖިލީސް މެމްބަރުންގެ މުސާރައަށް ބަދަލުގެނައުން ރަނގަޅީ މަޖިލީސް ދައުރެއްނިމި އާދައުރެއްގެ އިންތިހާބަށް ސަބަބަކީ އެތައް މިލިއަން ރުފިޔާ ހަރަދުކޮށް މަޖިލީހަށް ވަންނަ ތަނުން މުސާރަ ކުޑަކޮށްލުމުން އިިންތިހާބަށް ނެގިދަރަނި އަދާކުރާނެ ގޮތެއް ނޯންނާނެ ވީމަ އަލަށް 21ވަނަ މަޖިލީހަށް މެމްބަރަކަށް 5،000 ރުފިޔާ ކަނޑައެޅީމަ އެމުސާރަ އޯކޭވެގެން ކުރިމަތިލާ މެމްބަރުންނަކަށް ޝަކުވާކުރެވޭކަށް ނޯންނާނެ،" ފަލާހު ވިދާޅުވި އެވެ.
ފަލާހު ވަނީ އެމްޑީޕީގެ މެޖޯރިޓީ އޮތް 19 ވަނަ ރައްޔިތުންގެ މަޖިލީހުގައި މެންބަރުންގެ މުސާރަ އެއް ލައްކަ ރުފިޔާއަށް ބޮޑުކުރަން އޭރު މާލިއްޔަތު ކޮމިޓީން ފާސްކުރިކަން ފާހަގަކުރައްވާފަ އެވެ. ނަމަވެސް އެކަން އެގޮތަށް ނުކުރަން އިރުޝާދު ދެއްވީ ރައީސް ޑރ. މުހައްމަދު މުއިއްޒު ކަމަށް ފަލާހު ވިދާޅުވި އެވެ.
މަޖިލިސް މެންބަރުންގެ މުސާރަ ކުޑަކުރަން ސޮއިކުރަމުންދާ ޕެޓިޝަންގައި ކުރީގެ ރައީސުންގެ އިނާޔަތާއި ފަނޑިޔާރުންގެ މުސާރަ ހިމަނަން ފެންނަ ކަމަށްވެސް ފަލާހު ވިދާޅުވި އެވެ.
މަޖިލީހުގެ މެންބަރުންނަށް މުސާރައިގެ ގޮތުގައި މިހާރު ލިބެނީ 62،500 ރުފިޔާއާއި ކޮމިޓީ އެލަވަންސްގެ ގޮތުގައި ލިބޭ 20،000 ރުފިޔާއާ އެކު ޖުމްލަ 82،500 ރުފިޔާ އެވެ.