އެމްޑީޕީގެ ރިޔާސީ ޕްރައިމަރީގެ ވޯޓުލުން ހުއްޓުވަން ސިވިލް ކޯޓުން ދާދި ދެންމެއަކު އަމުރެއް ނެރެފި އެވެ.
ޕްރައިމަރީ ހުއްޓުވަން ސިވިލް ކޯޓުން ވަގުތީ އަމުރެއް މީގެއިރުކޮޅެއް ކުރިން ނެރެފައިވަނީ އެ އިންތިހާބު ހުއްޓުވުމަށް އެޓާނީ ޖެނަރަލް އޮފީހުން ސިވިލް ކޯޓަށް މައްސަލައެއް ވައްދާފައިވާތީ އެވެ. އެ ޕްރައިމަރީ ހުއްޓުވައި ދިނުމަށް އިލެކްޝަން ކޮމިޝަނުން ފުލުހުންނާއި ހޯމް މިނިސްޓްރީގައި ވެސް ވަނީ އެދިފަ އެވެ.
އެމްޑީޕީގެ ޕްރައިމަރީގައި ވާދަ ކުރައްވަނީ 13 އަހަރުގެ ޖަލު ހުކުމެއްގައި ހުންނެވި ކުރީގެ ރައީސް މުހައްމަދު ނަޝީދު އެކަންޏެވެ. އެ ޕްރައިމަރީގެ ވޯޓުލުން މިއަދު މެންދުރު 2:00 ގައި ވަނީ ފަށައިފަ އެވެ. އެ ޕްރައިމަރީގައި ވޯޓްލުމަށް އެމްޑީޕީގެ ގިނަ މެންބަރުން ވަނީ ވޯޓްފޮށި ހުރި ތަންތަނަށް ޖަމާވެ ކިޔޫ ހަދައިފަ އެވެ.
"ދެން ފަހެ، މޯލްޑިވްސް ޑިމޮކްރަޓިކް ޕާޓީ (އެމްޑީޕީ)އިން ގ. ކެނެރީގެ މުހައްމަދު ނަޝީދު، ރިޔާސީ އެ ޕްރައުމަރީއެއްގައި ވާދަކުރެވޭ ގޮތަށް، އެމްޑީޕީ އިން ބާއްވާ ރިޔާސީ ޕްރައިމަރީ ނުބޭއްވުމަށާއި، އެކަން ހުއްޓުވުމަށް މޯލްޑިވްސް ޑިމޮކްރަޓިކް ޕާޓީ
(އެމްޑީޕީ)އަށް އަންގައި، އަދި އެގޮތަށް އެ ޕްރައިމަރީ ބާއްވާ ނަމަ، އެކަން ހުއްޓުވުމަށް މޯލްޑިވްސް ޕޮލިސް ސާވިސްއަށާއި، ދައުލަތުގެ ކަމާ ބެހޭ މުއައްސަސާތަކުގެ މައްޗަށް އަންގާ އަމުރު ކުރަމެވެ،" ސިވިލް ކޯޓްގައި ގާޒީ އަލީ އަބްދުﷲ ސޮއި ކުރައްވާ ނެރުއްވި އަމުރުގައިވެ އެވެ.
އަމުރު ނެރުމާއެކު އެ އަމުރު ތަންފީޒުކުރުމުގެ މަސައްކަތް ފުލުހުން ވަނީ ފަށާފަ އެވެ. އަމުރު ނެރުނުތާ އިރުކޮޅެއްގެ ތެރޭގައި ފުލުހުން ކުރި ޓްވީޓެއްގައި ބުނީ، ސިވިލް ކޯޓުން ނެރުނު އަމުރު ތަންފީޒުކުރުމުގެ މަސައްކަތް ފުލުހުން ފަށާފައިވާ ކަމަށެވެ. ފުލުހުން މިހާރު ވަނީ އިންތިހާބުގެ ކަވަރޭޖް ހުއްޓާލުމަށް ބައެއް ޓީވީ ސްޓޭޝަންތަކަށް އަންގާފަ ކަމަށް މައުލޫމާތު ލިބެ އެވެ.
ޕްރައިމަރީގައި ރައީސް ނަޝީދު "ޖަޒީރާ ރައީސް"ގެ ނަމުގައި ބޮޑު ކެމްޕެއިން ކުރައްވާފައިވާއިރު އެކަންކަން ޕްރޮމޯޓްނުކުރުމަށް އިއްޔެ ހޯމް މިނިސްޓްރީންނާއި ބްރޯޑްކާސްޓިން ކޮމިޝަނުން ވަނީ މީޑިއާތަކަށް އިންޒާރުދީފަ އެވެ.