އެއްވެސް އެންގުމަކާ ނުލާ އަމިއްލަ ތަންތަނަށް ވަދެގަތުމުގެ ބާރު ފުލުހުންނަށް ދިނުމަށް ޖިނާއީ އިޖުރާއަތުގެ ގާނޫނަށް ސަރުކާރުގެ ފަރާތުން އިސްލާހު ހުށަހަޅައިފި އެވެ.
ސަރުކާރުގެ ފަރާތުން ފޭދޫ ދާއިރާގެ މެންބަރު އިބްރާހިމް ދީދީ ހުށަހެޅުއްވި އިސްލާހުގައިވާ ގޮތުން އަމިއްލަ ތަނަކަށް ވަނުމުގެ ކުރިން އެތަނެއްގަ ތިބި ބަޔަކަށް އަންގައިފިނަމަ ބަލާފާސްކުރުމުގެ މަގުސަދު ގެއްލޭނެމަ އެތާ ތިބި ބަޔަކަށް ނާންގާ އެތަނަށް ވަނުމުގެ އިހްތިޔާރު ގާނޫނު ތަންފީޒުކުރާ އިދާރާތަކުގެ އޮފިސަރުންނަށް ލިބިގެންވާ ކަމަށެވެ.
މިހާރު ޖިނާއީ އިޖުރާއަތުގެ ގާނޫނުގައި މި ވާހަކައެއް ނޯވެ އެވެ. ނަމަވެސް ގާނޫނުގެ 33 ވަނަ މާއްދާގެ (ރ)ގައި ބުނެފައިވަނީ ބަލައި ފާސްކުރުމުގެ އަމުރެއް ތަންފީޒުކުރުމުގެ ގޮތުން އަމިއްލަ ތަނަކަށް ވަނުމުގެ ކުރިން، އެތަނުގައި ތިބި ބަޔަކަށް އެތަނަށް ވަންނަކަން އަންގަންވާނެ ކަމަށެވެ.
ނަމަވެސް އެ މާއްދާގެ ފަހަތަށް އިތުރު ދެ އަކުރު އިސްލާހުގައި ހިމަނާ، އެއްވެސް އެންގުމަކާ ނުލާ ވަދުމުގެ ހުއްދަ ފުލުހުންނަށް ދޭން އިސްލާހުގައި ވަނީ ނިންމާފަ އެވެ. އެގޮތުން އިސްލާހުގައި ބުނެފައިވަނީ އެތަނަކަށް ވަނުމުގެ ކުރިން އަންގަންޖެހޭނެ ކަމަށް ބުނެފައިވީ ނަމަވެސް ދުރާލާ އެންގުން ލާޒިމް ނޫން ކަމަށެވެ. ވަނުމުގެ ހިނދުކޮޅެއް ކުރިން އެންގުމުން ފުދޭނެ ކަމަށް ވަނީ ބަޔާންކޮށްފަ އެވެ. އަދި އެންގުމަކާ ނުލާ ވެސް ވަނުމުގެ އިހްތިޔާރު އެބަ އޮތް ކަމަށެވެ.
އިތުރަށް އިސްލާހުގައި ބުނެފައިވަނީ ތަހުގީގުކުރަމުންދާ ޖިނާއީ ކުށަކާ ގުޅިގެން އާންމު ތަނަކަށް ވަންނަންޖެހިއްޖެނަމަ، ކޯޓު އަމުރަކާ ނުލައި، އެތަނަކަށް ވަނުމުގެ ބާރު، ގާނޫނު ތަންފީޒުކުރާ ކޮންމެ އިދާރާއަކަށް ލިބިގެންވާ ކަމަށެވެ. މިހާރު ގާނޫނު އޮތް ގޮތުން އެ ބާރު އޮތީ ފުލުހުންގެ އެކަންޏެވެ.
އިސްލާހުގައި ވަނީ އަމިއްލަ ތަނަކަށް ކޯޓު އަމުރަކާ ނުލާ ވަނުމުގެ ބާރު ހަމައެކަނި ފުލުހުންނަށް ދީފަ އެވެ. މިހާރު ގާނޫނުގައި ބުނެފައިވަނީ ގާނޫނު ތަންފީޒުކުރާ އިދާރާއަކުން ތަހްގީގުކުރަމުންދާ ޖިނާއީ ކުށަކާ ގުޅިގެން އަމިއްލަ ތަނަކަށް ވަންނަންޖެހިއްޖެނަމަ، އެތަނަކަށް، އެތަނެއްގެ ވެރިފަރާތުގެ ރުހުމަކާ ނުލައި ވަދެވޭނީ، ކޯޓު އަމުރަކާ އެކުގަ ކަމަށެވެ.