ޝަރުއީ ދާއިރާއަށް ޒަމާނީ ތަރައްގީތައް ގެނައުމަށް ސަރުކާރުން އެކަށީގެންވާ ބަޖެޓެއް ދޭން ޖެހޭ ކަމަށާއި އެކަމަށް އިލްތިމާސް ކުރައްވާ ކަމަށް އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ރޭ ވިދާޅުވެއްޖެ އެވެ.
އުއްތަމަ ފަނޑިޔާރު މިހެން ވިދާޅުވީ ސުޕްރީމް ކޯޓަށް 10 އަހަރު ފުރުން ފާހަގަ ކުރަން ރޭ ދަރުބާރުގޭގައި ބޭއްވި ރަސްމިއްޔާތުގަ އެވެ. އެ ރަސްމިއްޔާތުގައި ޝަރުއީ ދާއިރާގެ ގިނަ ބޭފުޅުންނާއި މިނިވަން މުއައްސަސާތަކުގެ ވެރިން ބައިވެރިވެވަޑައިގެންނެވި އެވެ.
ރަސްމިއްޔާތުގައި އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވިދާޅުވީ ޝަރުއީ ދާއިރާއަށް ތަރައްގީ ގެނައުމަށް ކަނޑައަޅާފައިވާ ލަނޑުދަނޑިތައް ހާސިލް ކުރުމަށް އެންމެ ބޮޑު ގޮންޖެހުމަކީ ބަޖެޓްގެ ދަތިކަން ކަމަށެވެ. އެކަމަށް ކުރިއަށް އޮތް ތަނުގައި އެކަށީގެންވާ ހައްލެއް ލިބިގެންދާނެ ކަމަށް އުއްމީދު ކުރައްވާ ކަމަށް ވެސް ވިދާޅުވި އެވެ.
"އަޅުގަނޑުގެ އިލްތިމާސްއަކީ ކޯޓުތަކަށް ވެސް އަދި ޝަރުއީ ދާއިރާއަށް ވެސް ތަރައްގީއަށްޓަކައި މުހިންމު މަސައްކަތްތަކެއް އަދާކުރާ މުއައްސަސާއަކަށް ދެއްވަން ޖެހޭ މާލީ ސަޕޯޓް ފުރިހަމަ ގޮތުން ދެއްވުން، ޒަމާނަށް އަންނަ ބަދަލުތަކާ އެއްވަރަށް ތަރައްގީކޮށް އިތުބާރާއި އިހްތިރާމް ލިބިގެންވާ ނިޒާމަކަށް ރާއްޖޭގެ ޝަރުއީ ނިޒާމް ހެދޭނީ ބަޖެޓްގެ ސަޕޯޓް އަޅުގަނޑުމެންނަށް ފުރިހަމައަށް ލިބިގެން،" އުއްތަމަ ފަނޑިޔާރު ވިދާޅުވި އެވެ.
އަންނަ އަހަރަށް ލަފާކުރާ ބަޖެޓްގެ މަސައްކަތް ފަށާފައިވަނިކޮށް ޝަރުއީ ދާއިރާއަށް ރަނގަޅު ބަޖެޓެއް ދެއްވުމަށް އެދިވަޑައިގެންފައިވާއިރު، މީގެކުރިން ވެސް ބަޖެޓް ދަތިވެގެން ސުޕްރީމް ކޯޓުން ކަންބޮޑުވުން ފާޅުކޮށްފައިވެ އެވެ. އެގޮތުން މި އަހަރަށް ދިން ބަޖެޓް ވެސް ކުޑަވެ، ބައެއް ކަންކަން ޝަރުއީ ދާއިރާއިން މަޑު ޖައްސާލި އެވެ. ޝަރުއީ ދާއިރާގެ ރަސްމީ ގަޑި ވެސް ކުޑަކުރި އެވެ.
އުއްތަމަ ފަނޑިޔާރު ވިދާޅުވި ގޮތުގައި ސުޕްރީމް ކޯޓަށް 10 އަހަރު ފުރުނުއިރު ކުރިއަށް ލަނޑުދަނޑިތަކެއް ގާއިމް ކުރަން ޖެހެ އެވެ. އެގޮތުން ދަށު ކޯޓުތަކަށް މިނިވަންކަމާއެކު ޝަރީއަތްތައް ކުރިއަށް ގެންދެވުމާއި އަދުލު އިންސާފަށް ވާސިލްވުމަށް ފަސޭހަކުރުމާއި ހުކުމް ކުރުމުގެ މަރުހަލާ ދިގު ދެމިގެންދާ ދިޔުން ނިމުމަކަށް ގެނައި ކޭސް މެނޭޖްމެންޓް ރަނގަޅު ކުރަންޖެހޭކަން ފާހަގަކުރެއްވި އެވެ.
"ހަމައެހެންމެ، އަދުލު އިންސާފުގެ ނިޒާމަކީ މާލީ އަދި އިދާރީ ގޮތުން ކުރަންޖެހޭ ކަންކަމުގައި ވެސް މުސްތަގިއްލު ކަމާއެކު ހަރުދަނާކަމާއެކު ހިނގާ ނިޒާމަކަށް ހެދުމަކީ ވަރަށް މުހިންމު އަދި ޟަރޫރައްތެރި ކަމެއް، ކޯޓުތަކުގެ އިދާރީ އޮނިގަނޑު ޒަމާނަށް ފެތެންޖެހޭ، ވީހާވެސް އަގު ހަރަދުކޮށް އެކަމަކު ކޯޓުގެ މަސައްކަތްތައް ގާބިލްކަމާއެކު އަވަސްކަމާއެކު ކުރިއަށް ދެވޭނެ ގޮތް ހޯދަން ޖެހޭނެ،" އުއްތަމަ ފަނޑިޔާރު ވިދާޅުވި އެވެ.
އުއްތަމަ ފަނޑިޔާރު ވިދާޅުވީ ކޯޓުތަކުގެ ފަނޑިޔާރުންނާއި މުވައްޒަފުންނަަށް ރައްކާތެރިކަން ލިބޭނެ އިންތިޒާމް ހަމަޖެއްސުމަކީ ވެސް މުހިންމު ކަމެއް ކަމަށެވެ. ސުޕްރީމް ކޯޓުން ކަނޑައަޅާ ސިޔާސަތުތަކާ އެއްގޮތަށް މަސައްކަތް ކުރާ ތަނަކީ ޖުޑީޝަލް އެޑްމިނިސްޓްރޭޝަން ކަމަށްވާތީ އެތަން ހަރުދަނާ ކުރުމަށް ވަރަށް ބޮޑު އިސްކަމެއް ދެއްވާ ކަމަށް ވެސް އުއްތަމަ ފަނޑިޔާރު ވިދާޅުވި އެވެ.
"ޖުޑީޝަލް އެޑްމިނިސްޓްރޭޝަކީ ސުޕްރީމް ކޯޓާއި ހައިކޯޓުތަކާއި ސުޕީރިއާ ކޯޓުތަކާއި މެޖިސްޓްރޭޓް ކޯޓުތަކަށް ދުވަހުން ދުވަހަށް ބޭނުންވާ އިދާރީ އެހީތެރިކަން އަވަސް ސްޕީޑެއްގައި ފޯރުކޮށްދިނުމުގެ ކެރި ފޯރުކަން ލިބިފައިވާ މުއައްސަސާއަކަށް ހެދުން،" އުއްތަމަ ފަނޑިޔާރު ވިދާޅުވި އެވެ.
އޭގެއިތުރުން ސުޕްރީމް ކޯޓުގެ ދަށުން ހިނގާ ޖުޑީޝަލް އެކެޑެމީ ހަރުދަނާ ކުރުމުގެ މުހިންމުކަން ވެސް އުއްތަމަ ފަނޑިޔާރު ފާހަގަ ކުރެއްވި އެވެ. އުއްމީދަކީ ޖުޑީޝަލް އެކެޑެމީ 2015 ވަނަ އަހަރު އުފެއްދި ލަނޑުދަނޑިތައް ހާސިލްވާ ގޮތަށް އެތަން ތަރައްގީ ވެގެން ދިޔުން ކަމަށް ވެސް ވިދާޅުވި އެވެ.