ހަބަރު

ޔާމީންގެ އެކައުންޓްތައް ފްރީޒްކޮށްފި

ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ އެކައުންޓްތައް ފްރީޒް ކުރުމަށް ކުރިމިނަލް ކޯޓުން އަމުރެއް ނެރެފި އެވެ.

އެފަދަ އަމުރެއް އެ ކޯޓުން ނެރެފައިވާކަން "އަވަސް"އަށް ވަނީ ކަށަވަރުކުރެވިފަ އެވެ. ނަމަވެސް އެ ކޯޓުގެ ރަސްމީ ބަހެއް އަދި ނުލިބެ އެވެ.

މިކަމާ ގުޅިގެން ރައީސް ޔާމީންގެ އަދި ފުލުހުންގެ ބަހެއް ވެސް ނުލިބެ އެވެ.

ރައީސް ޔާމީންގެ އެކައުންޓްތައް ފްރީޒް ކުރަން އަމުރު ނެރެފައިވާއިރު ގާނޫނާ ހިލާފަށް މާލީ މުއާމަލާތްތަކެއް ކުރި ކަމަށް ތުހުމަތުވާ މައްސަލައެއްގެ ތަހުގީގަށް ފުލުހަށް ހާޒިރުވާން ރައީސް ޔާމީނަށް ފުލުހުން ވަނީ ޗިޓް ފޮނުވާފަ އެވެ. އަންގާފައިވަނީ މާދަމާ ފުލުހަށް ހާޒިރުވުމަށެވެ.

އެމަނިކުފާނުގެ ވަކީލް އާޒިމާ ޝުކޫރު ވިދާޅުވެފައިވާ ގޮތުގައި ރައީސް ޔާމީން ފުލުހަށް ހާޒިރުކުރަން ނިންމާފައިވަނީ ރިޔާސީ އިންތިހާބުގެ ދުވަސްވަރު އެކި ގޮތްގޮތަށް އެމަނިކުފާނުގެ އެކައުންޓަށް ފައިސާ ވަދެފައިވާތީ އެވެ.

އެހެން ނަމަވެސް އެ އެކައުންޓަކީ ރިޔާސީ އިންތިހާބުގެ ގާނޫނީ އޮނިގަނޑުގައިވާގޮތުގެ މަތިން އިލެކްޝަންސް ކޮމިޝަނުން ޑިކްލެއާ ކޮށްފައިވާ އެކައުންޓެއް ކަމަށް އާޒިމާ ވަނީ ވިދާޅުވެފަ އެވެ.