ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ބޭންކް އެކައުންޓްތައް ފްރީޒް ކުރުމަށް ކުރިމިނަލް ކޯޓުން ނެރުނު ކޯޓު އަމުރުގެ އިސްތިއުނާފު އަޑުއެހުންތައް މިއަދު ހައިކޯޓުގައި ނިންމާލައިފި އެވެ.
އެ މައްސަލާގައި މިއަދު މެންދުރުފަހު ވަނީ އަޑުއެހުމެއް ބާއްވާފަ އެވެ. އެ އަޑުއެހުން ކުރިއަށް ގެންދިޔައީ ސިއްރުންނެވެ. އަޑުއެހުން ނިމުމުން ހައިކޯޓުން ބުނި ގޮތުގައި މިއަދު އެ މައްސަލާގެ އަޑުއެހުންތައް ވަނީ ނިންމާލާފަ އެވެ. އަދި އިތުރު ކަމެއް ސާފުކުރަން ނެތްނަމަ ދެން އޮންނާނީ މައްސަލާގެ ހުކުމް އިއްވުމުގެ އަޑުއެހުން ކަމަށެވެ.
މިއަދުގެ ޝަރީއަތުގެ އަޑުއެހުމަށް ރައީސް އަބްދުﷲ ޔާމީން ވެސް ވަޑައިގެންނެވި އެވެ. އަދި، ޝަރީއަތުގައި އެމަނިކުފާނުގެ އަމިއްލަ ދިފާއުގައި ވާހަކަފުޅު ވެސް ދައްކަވާފައިވެ އެވެ.
ފުލުހުން އެދިގެން ކްރިމިނަލް ކޯޓުން ނެރުނު އަމުރުގެ ދަށުން ފްރީޒް ކުރި ރައީސް ޔާމީންގެ އެކައުންޓްތަކުގައި 100 މިލިއަން ރުފިޔާއަށްވުރެ ގިނަ ފައިސާ ހުރި ކަމަށް ފުލުހުން ވަނީ ބުނެފަ އެވެ. އެކައުންޓްތައް ފްރީޒް ކުރި ފަހުން ރައީސް ޔާމީނާ ސުވާލުކުރުމަށް ފުލުހަށް ވެސް ވަނީ ހާޒިރުކޮށްފަ އެވެ. އަދި މިހާރު ވަނީ މަނީ ލޯންޑްރިންގެ ދައުވާ ވެސް އެމަނިކުފާނުގެ މައްޗަށް އުފުލާފަ އެވެ.
ރައީސް ޔާމީންގެ އެކައުންޓްތައް ފްރީޒް ކޮށްފައިވަނީ ރިޔާސީ ކެމްޕޭނަށް ލިބުނު ފައިސާ އެމަނިކުފާނުގެ ނަމުގައި ހުރި އެކައުންޓަކަށް ޖަމާވެފައިވާތީ އާއި އެމްއެމްޕީއާރުސީގެ ހިޔާނާތާ ގުޅުން ހުރި އެއް މިލިއަން ޑޮލަރު އެމަނިކުފާނުގެ އެކައުންޓަށް ޖަމާވެފައި ވާތީ އެވެ.
ރައީސް ޔާމީންގެ ގާނޫނީ ޓީމުގެ އެމަނިކުފާނުގެ ވަކީލް އާޒިމާ ޝަކޫރު އެ މައްސަލައާ ގުޅޭ ގޮތުން ވިދާޅުވެފައިވަނީ އެކައުންޓްތައް ފްރީޒް ކޮށްފައިވަނީ ސިޔާސީ ބޭނުމެއްގައި ކަމަށާއި އެކަމުގައި ގާނޫނީ މައްސަލަތަކެއް ވެސް އެބަހުރި ކަމަށެވެ. އެ މައްސަލާގައި ފާހަގަކޮށްފައިވާ ކަންތައްތަކާއި ހެކިތަކަށް ބަލާއިރު އެ މައްސަލަ ކާމިޔާބު ކުރެވޭނެ ކަމަށް ގަބޫލު ކުރައްވާ ކަމަށް އާޒިމާ ވިދާޅުވި އެވެ.
އާޒިމާ ވިދާޅުވި ގޮތުގައި އެކައުންޓްތައް ފްރީޒް ކުރި ކަމެއް އަދި ރަސްމީކޮށް ރައީސް ޔާމީނަށް ނާންގާ ކަމަށެވެ. އޭނާ ވިދާޅުވި ގޮތުގައި އެމްއެެމްޕީއާރްސީގެ ކޮރަޕްޝަންގެ ތުހުމަތުގައި ހަމައެކަނި ރައީސް ޔާމީންގެ އެކައުންޓްތައް ފްރީޒް ކުރުމަކީ ސުވާލު އުފެދޭ ކަމެއް ކަމަށާއި އެކަމުން ދޭހަވަނީ އެއީ ސިޔާސީ މަގުސަދެއްގަ ސަރުކާރުން ކުރަމުންދާ ކަމެއް ކަމަށް އާޒިމާ ވިދާޅުވި އެވެ.