ޝަރީއަތުގައި އޮންނަ މައްސަލަތަކުގެ އެކި މަރުހަލާތަކުގައި ޕްރޮސެކިއުޓާ ޖެނަރަލް (ޕީޖީ) އައިޝަތު ބިޝާމްގެ ސްޓޭންޑް އެކި ފަހަރަށް ތަފާތުވާނަމަ ފިޔަވަޅު އަޅާނެ ކަމުގެ ވަރުގަދަ އިންޒާރެއް ހައިކޯޓުން ދީފި އެވެ.
މިފަހުން ޕީޖީ ވަނީ ކުރީގެ ނައިބު ރައީސް އަހުމަދު އަދީބު އަބްދުލްގަފޫރު ފިސްތޯލައެއް ގެންގުޅުނު ކަމަށް ބުނާ މައްސަލާގައި ސްޓޭންޑް ބަދަލު ކުރައްވާފަ އެވެ. ކުރިމިނަލް ކޯޓާއި ހައިކޯޓުގައި ޕީޖީ ވަނީ އެ މައްސަލަ ސާބިތު ކުރަންޖެހޭ ގޮތަށް ވަކާލާތު ކުރައްވާފަ އެވެ.
ނަމަވެސް އެންމެ ފަހުން އެ މައްސަލަ ސުޕްރީމް ކޯޓަށް އަދީބުގެ ފަރާތްޕުޅުން ހުށަހެޅުއްވުމުން ޕީޖީ ވަނީ އެ މައްސަލާގައި ކުރިމިނަލް ކޯޓާއި ހައިކޯޓުން އިއްވާފައިވާ ހުކުމް ގޯސް ކަމަށް ވިދާޅުވެފަ އެވެ. އެ ހުކުމް ގޯސްކަން އެނގިވަޑައިގަތީ ހެކި ދިރާސާ ކުރުމުގެ ތެރޭގައި ކަމަށް ވެސް ވިދާޅުވެފައި ވެއެވެ. އެހެންވެ ޕީޖީގެ ވަކީލުން އެދިވަޑައިގެންފައި ވަނީ އެ ހުކުމް ބަދަލުކޮށް ދެއްވުމަށެވެ. ނަމަވެސް ކުރިމިނަލް ކޯޓާއި ހައިކޯޓުން އެ މައްސަލާގައި ހުކުމް އިއްވީ ޕީޖީ ހުށަހެޅުއްވި ހެކިތަކާއި ދެއްކި ވާހަކަތަކަށް ރިއާޔަތްކޮށެވެ.
މިއަދު ހައިކޯޓުން ވަނީ އަދީބު ވެސް ހިމެނޭ ފިނިފެންމާ ލޯންޗުކޮޅު ގޮއްވާލި މައްސަލައިގެ ތެރެއިން ދައުވާ ކުރި ކުރީގެ ސިފައިންގެ މީހެއް ކަމަށްވާ އަހުމަދު ތިހާމްގެ މައްޗަށް ހުކުމް އިއްވުމުގެ އަޑުއެހުން ބާއްވާފަ އެވެ. އެ އަޑުއެހުން ފެށުމަށް ފަހު ހުކުމް އިއްވުމުގެ ކުރިން ރިޔާސަތުގައި އިންނެވި ފަނޑިޔާރު މުހައްމަދު ނިޔާޒު ޕީޖީއާ ސުވާލެއް ކުރެއްވި އެވެ.
ފަނޑިޔާރު ނިޔާޒު އެއްސެވީ އެ މައްސަލާގައި ޕީޖީގެ ސްޓޭންޑް އަދިވެސް އޮތީ ކުރިން އޮތް ގޮތަށްތޯ އެވެ؟ އެ ސުވާލަށް ޖަވާބު ދެއްވަމުން ޕީޖީ އޮފީހުގެ ވަކީލް އަހުމަދު ނައުޝާދު ވިދާޅުވީ މި މައްސަލާގައި އިތުރު ސްޓޭންޑެއް ނެތް ކަމަށެވެ. ޕީޖީއިން ވަކާލަތު ކުރަނީ އެ މައްސަލާގައި އެންމެ ފުރަތަމަ ވެސް ހުށަހެޅި ނުކުތާތަކުގެ މައްޗަށް ކަމަށެވެ.
ދެން ފަނޑިޔާރު އެއްސެވީ، ދަށު މަރުހަލާތަކުގައި ވަކި ގޮތަކަށް ވަކާލާތު ކުރުމަށްފަހު އެއަށްވުރެ މަތީ މަރުހަލާތަކަށް ގޮސް ސްޓޭންޑް ބަދަލު ކުރުމަކީ ޕީޖީ ކުރާ ކަމެއްތޯ އެވެ؟ ޖަވާބުގައި ނައުޝާދު ވިދާޅުވީ އެގޮތަށް ސްޓޭންޑް ބަދަލު ނުކުރާ ކަމަށެވެ.
ނައުޝާދު އެހެން ވިދާޅުވުން، ފަނޑިޔާރު ވަނީ އެކަން ފާހަގަ ކުރެވޭ ކަމަށާއި އެގޮތަށް ސްޓޭންޑް ބަދަލު ކުރާ ނަމަ އެއީ ޕީޖީ ހައްދަވާ ވަރަށް ބޮޑު ގޯހެއް ކަމަށެވެ. އަދި އެގޮތަށް ޕީޖީ އަމަލު ކުރައްވާނަމަ، އެކަމަނާއަށް ތައުދީބީ ފިޔަވަޅު އަޅަން ޖެހިދާނެ ކަމަށެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ޕީޖީ އައިޝަތު ބިޝާމް ކުރެއްވި ބައެއް ދައުވާތައް އާ ސަރުކާރު އައި ފަހުން އަނބުރާ ގެންދަވާފައިވެސް ވެއެވެ. އޭގެ ތެރޭގައި އެކެއް ފެބުރުއަރީގެ އަމުރާ ގުޅިގެން އެތައް ބަޔަކަށް އުފުލި ޓެރަރިޒަމްގެ ދައުވާތައް ހިމެނެ އެވެ. އެފަދަ ކަންކަމާ ހުރެ އެކަމަނާގެ އިތުބާރު ނެތް ކަމުގެ މައްސަލައެއް ރައްޔިތުންގެ މަޖިލީހަށް ސަރުކާރު ކޯލިޝަންގެ މެންބަރެއް ހުށަހެޅި އެވެ. ނަމަވެސް ފަހުން އެ މައްސަލަ ވަނީ އަނބުރާ ނަގާފަ އެވެ.