ސުޕްރީމް ކޯޓުގެ ފަނޑިޔާރު އަބްދުﷲ ދީދީގެ ސަސްޕެންޑް ކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ)އިން ނިންމާފައިވާ ނިންމުމާ ގުޅިގެން އެއްވެސް ފިޔަވަޅެއް ނޭޅުމަށް ސުޕްރީމް ކޯޓުން އަމުރުކޮށްފި އެވެ.
ސުޕްރީމް ކޯޓުން މިއަދު އެގޮތަށް އަމުރުކުރީ ނެރުނު ވަގުތީ އަމުރެއްގަ އެވެ. އެ ވަގުތީ އަމުރު ނެރެފައިވަނީ އިއްޔެ ކުރި ސަސްޕެންޝަނާ ގުޅިގެން އަބްދުﷲ ދީދީ ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލާގަ އެވެ.
ޖޭއެސްސީއިން އިއްޔެ ބޭއްވި ބައްދަލުވުމުގައި އަބްދުﷲ ދީދީ ސަސްޕެންޑް ކުރަން ނިންމީ، އޭނާއަށް ޖިނާއީ ތުހުމަތެއް ކުރެވި، އެ މައްސަލަ ފުލުހުން ތަހުގީގު ކުރަމުންދާތީ އެވެ. އެ މައްސަަލައަކީ މިހާރު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް 13 އަހަރުގެ ޖަލު ހުކުމެއް އިއްވުމަށް އެއް މިލިއަން ޑޮލަރުގެ ރިޝްވަތު ނެންގެވި ކަމަށް ތުހުމަތު ކުރާ މައްސަލަ އެވެ. މައްސަލަ ތަހުގީގު ކުރުމަށް އެދިވަޑައިގެންފައިވަނީ ރައީސް ނަޝީދެވެ.
ފަނޑިޔާރު އަބްދުﷲ ދީދީ ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލާގައި ބުނެފައިވަނީ ރައީސް ނަޝީދު، އޭނާއާ ދެކޮޅަށް ހުށަހަޅާފައިވާ މައްސަލައަކީ ގާނޫނު އަސާސީ އާއި ފަނޑިޔާރުންގެ ގާނޫނާއި ޖޭއެސްސީ އާއި ގާނޫނީ އުސޫލުތަކާ ހިލާފު މައްސަލައެއް ކަމަށެވެ. އަދި، ގާނޫނު އަސާސީގައި ބަޔާންކޮށްފައިވާ ދުސްތޫރީ މަދުބައުތަކާއި އުސޫލުތަކުގެ ބޭރުން ޣައިރު ގާނޫނީ އިޖުރާއަތްތަކެއްގެ މައްޗަށް ހުށަހަޅާފައިވާ މައްސަލައެއް ކަމަށެވެ.
އެހެންވެ، އެ މައްސަލާގައި އޭނާގެ މަގާމުގެ މަސްއޫލިއްޔަތު އެކަހެރިވުމަށާއި ވަޒީފާއަށް ނުނުކުތުމަށް ޖޭއެސްސީއިން އަންގާފައިވާ އެންގުން ބާތިލްކޮށް ދިނުމަށް ވަނީ އެދިފަ އެވެ. އަދި، އެ މައްސަލާގައި ގޮތެއް ނިންމެންދެން އެ ސަސްޕެންޝަނާ ގުޅިގެން ފިޔަވަޅު އެޅުން ހުއްޓުވުމުގެ ވަގުތީ އަމުރަކަށް އެދިފައިވެ އެވެ. އެ މައްސަލަ ސުޕްރީމް ކޯޓަށް މިއަދު ހުށަހަޅާފައިވާއިރު މިހާރު ވަނީ މައްސަލަ ބަލައިގެންފަ އެވެ.
އެދުނު ގޮތަށް ސުޕްރީމް ކޯޓުން މިއަދު ނެރެފައިވާ ވަގުތީ އަމުރުގައި ބުނެފައިވަނީ ދުސްތޫރީ މައްސަލާގައި ސުޕްރީމް ކޯޓަށް ގޮތެއް ކަނޑައެޅެންދެން ފަނޑިޔާރު ދީދީ މަސްއޫލިއްޔަތު އެކަހެރިކުރުމަށް ނިންމާފައިވާ ނިންމުމަށް އަމަލު ކުރުން ފަސްކުރަން އަމުރުކުރާ ކަމަށެވެ. އަދި ޖޭއެސްސީއަށް ހުށަހަޅާފައިވާ މައްސަލައާ ގުޅިގެން އިތުރަށް އެއްވެސް އިޖުރާއަތެއް ކުރިއަށް ނުގެންދިޔުމަށާއި ފަނޑިޔާރު ދީދީގެ މައްޗަށް އެއްވެސް ފިޔަވަޅެއް ނޭޅުމަށް ޖޭއެސްސީއަށާއި ކަމާބެހޭ މުއައްސަސާތަކުގެ މައްޗަށް ވަގުތީ އަމުރުގައި ވަނީ އަމުރުކޮށްފަ އެވެ.
މި އަމުރު ނެރެފައިވަނީ ސުޕްރީމް ކޯޓުގެ ތިން ފަނޑިޔާރުން ސޮއި ކުރައްވާ އެވެ. އެއީ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ އާއި ފަނޑިޔާރު އާދަމް މުހައްމަދު އަބްދުﷲ އާއި ފަނޑިޔާރު އަބްދުލްޣަނީ މުހައްމަދެވެ.