ރާއްޖެއަށް މަސްތުވާތަކެތި އެތެރެކޮށް ފުޅާ ދާއިރާއެއްގައި އެ ވިޔަފާރި ކުރަމުންދާ މައްސަލައަކާއި ގުޅިގެން ފުލުހުން ހައްޔަރުކޮށްފައިވާ ގއ. ހޯޑެނދޫ، އަލޯރާ، އަލީ އަރުޝަދުގެ މައްޗަށް ދައުވާ ކޮށްފައިވަނީ އޭނާ ކުށްކޮށްގެން ހޯދާފައިވާ މުދާ ދައުލަތަށް އަނބުރާ ނެގޭ ގޮތަށް ކަމަށް ޕްރޮސިކިއުޓާ ޖެނަރަލްގެ އޮފީހުން ބުނެފި އެވެ.
މުދާ ދައުލަތަށް އަނބުރާ ނެގޭ ގޮތަށް އާންމު ގޮތެއްގައި ދައުވާގައި ނުހިމަނަ އެވެ. ނަމަވެސް އަރުޝަދުގެ މައްޗަށް ޕްރޮސިކިއުޓާ ޖެނަރަލް ހުސެއިން ޝަމީމް ދައުވާ އުފުލާފައިވަނީ މަސްތުވާތަކެއްޗާބެހޭ ގާނޫނުގެ މުދާ އަނބުރާ ނެގުމުގެ މާއްދާއާ ހަވާލާދީ އެވެ.
އަލީ އަރުޝަދުގެ މައްޗަށް އުފުލާފައިވަނީ ޑައިމޯފިން ޓްރެފިކް ކުރުމުގެ ދައުވާ އެވެ. ޕްރޮސިކިއުޓާ ޖެނަރަލް ދައުވާގައި އެދިފައިވަނީ އެ ވިޔަފާރިކޮށްގެން ލިބުނު ކަމަށް ތުހުމަތުވާ 1،535،110 ރުފިޔާ އާއި 146،731 ޑޮލަރު ދައުލަތަށް ނަގައިދިނުމަށެވެ.
މި ދައުވާ އިއްޔެެ އުފުލާފައިވަނިކޮށް އަރުޝަދު ވަނީ ކޯޓުން ދޫކޮށްލާފަ އެވެ. މިކަމާ ގުޅިގެން ފާޑުކިޔުން ވެސް އޮތީ އަމާޒުވެފަ އެވެ.
އަރުޝަދަކީ 10 ގެއަކާއި ވެހިކަލްތަކެއް ބަލައި ފާސްކޮށް ނުވަ ކިލޯ ހެރޮއިން އާއި ހަތަރު ގްރާމް ކޮކެއިން އާއި ފައިސާތަކެއް ހޯދައި އެއާ ގުޅުން އޮތް ކަމުގެ ތުހުމަތުގައި ހައްޔަރުކުރި މީހެކެވެ.
އަރުޝަދުގެ ނަމުގައި ހުޅުވާފައިވާ ބޭންކް އެކައުންޓްގައި ހުރި ގިނަ އަދަދެއްގެ ފައިސާއަކީވެސް މަސްތުވާތަކެތި ވިއްކައިގެން ހޯދާފައިވާ ފައިސާ ކަމަށް ތުހުމަތު ކުރެވޭތީ ބޭންކް އެކައުންޓްވެސް ވަނީ ފްރީޒް ކޮށްފައެވެ. ފުލުހުން ބުނެފައިވާ ގޮތުގައި މި މައްސަލާގައި 4.6 މިލިއަނަށްވުރެ ގިނަ ރުފިޔާ ފުލުހުންގެ ބެލުމުގެ ދަށުގައިވާ ކަމަށެވެ.
ދެން މި މައްސަލައާ ގުޅިގެން ހައްޔަރުކޮށްފައިވަނީ ގދ. ހޯނޑެއްދޫ، އިތުރުމަތީގޭ، އަހުމަދު ސުނައިންއާ، ގދ. ހޯނޑެއްދޫ، މެޑްރިޓްހައުސް، އަހުމަދު ގިޔާސްއާ، ގދ. ހޯނޑެއްދޫ، ގުލޭނޫރަންމާގޭ، އަލީ ޒުބައިރެވެ. އެމީހުންގެ މައްޗަށް ވެސް ދައުވާތައް އުފުލާފައިވާއިރު އެމީހުން 10 ދުވަހު ބަންދުގައި ބެހެއްޓުމަށް ކޯޓުން އަމުރުކޮށްފައިވެ އެވެ.