މާލޭގެ މަގުތަކުގެ އަމަންކަން ނަގާލަން މަސައްކަތްކުރި ކަމުގެ ތުހުމަތުގައި 17 މީހަކު ހައްޔަރުކޮށްފައިވާ ކަމަށް ފުލުހުން ބުނެފި އެވެ.
މާލޭގެ ބައެއް މަގުތަކަށް ބައެއް ފަރާތްތަކުން އެއްވެ އަޑު އުފުލަމުން ދަނީ ރައީސް އަވަހާރަކޮށްލަން މަސައްކަތް ކުރެއްވި ކަމުގެ ތުހުމަތުގައި ނައިބު ރައީސް އަހުމަދު އަދީބު މިއަދު ހައްޔަރުކުރުމާއި ގުޅިގެންނެވެ.
ފުލުހުން ބުނީ މަގުތަކަށް ނުކުމެ މާލޭގެ އަމަން އަމާންކަން ނަގާލަން މަސައްކަތް ކުރި 17 މީހަކު މިހާތަނަށް ހައްޔަރުކޮށްފައިވާ ކަމަށާއި އޭގެ ތެރޭގައި 18 އަހަރު ނުފުރޭ 2 ކުޑަކުއްޖަކު ވެސް ހިމެނޭ ކަމަށެވެ.
ނައިބު ރައީސް އަހުމަދު އަދީބު މިއަދު ހައްޔަރުކުރުމާއި ގުޅިގެން މާލޭގެ ސުލްހަ ނަގާލަން ބަޔަކު މަސައްކަތް ކުރަން ރާވާފައިވާ ކަމުގެ މައުލޫމާތު ފުލުހުންގެ އިންޓެލިޖެންސަށް ލިބިފައިވާ ކަމަށް ފުލުހުން ވަނީ ބުނެފައެވެ. އެހެންކަމުން ކުރިއަށް އޮތް ދުވަސްތަކުގައި މާލޭގެ ބައެއް ސަރަހައްދު ތަކުގެ ސެކިއުރިޓީ ވަރުގަދަކޮށް، ގިނަ މަގުތަކެއްގައި ފުލުހުން ހަރަކާތްތެރިވާނެ ކަމަސް ވެސް އެ އިދާރާއިން ބުންޏެވެ.
މަގުތަކުގެ އަމާންކަން ކަށަވަރުކުރަން ފުލުހުން މިއަދު ހިންގަމުންދާ އޮޕަރޭޝަނުގައި، ޗާންދަނީ މަގު ސީގަލް ސަރަހައްދާއި ޝަހީދު ހުސައިން އާދަމް ބިލްޑިންގެ އިތުރުން އިސްކަންދަރު ބިލްޑިން ހިމެނޭ ސަރަހައްދުވެސް ފުލުހުން ވަނީ މިހާރު ބަންދުކޮށްފައެވެ.
ފުުލުހުންގެ އޮޕަރޭޝަންގައި މީހަކު ހައްޔަރުކޮށްގެން ގެންދަނީ -- އަވަސް ފޮޓޯ: އާމިނަތު އިބްރާހިމް