ފޮއްތެޔޮ ބޮޑުފުށީގައި މަރުވެފައި އޮއްވާ މިއަދު ފެނުނު މީހާއަކީ ވ. އަންބަރާ ބޭރުން އޮޔާ ދަނިކޮށް ފެނުނު ޑިންޑީއާ ގުޅުންހުރި މީހެއް ކަމަށް ފުލުހުން ބުނެފި އެވެ.
މަރުވެފައި އޮތް މީހާގެ ހަށިގަނޑު ފެނިފައި ވަނީ މިއަދު ހެނދުނު 11:00 ޖަހާ އެހާކަންހާއިރު އެވެ. އެއީ ބިދޭސީއެއް ކަމަށް ބެލެވޭއިރު އޭނާގެ ހަށިގަނޑު ފެނިފައި ވަނީ އެ ރަށަށް ދަރުކޮށަން ދިޔަ ބަޔަކަށެވެ. އޭގެ ކުރިން ވ. އަންބަރާ ކައިރިން އޮޔާދިޔަ ޑިންގީއެއްގައި އިން ސްރީ ލަންކާގެ މީހަކު ވަނީ ސަލާމަތް ކޮށްފަ އެވެ.
ފުލުހުން ބުނީ ފޮއްތެޔޮ ބޮޑުފުށީގައި މަރުވެފައި އޮއްވާ މިއަދު ފެނުނު މީހާއަކީ އަންބަރާ ބޭރުން އޮޔާ ދަނިކޮށް ފެނުނު ޑިންޑީއާ ގުޅުންހުރި މީހެއްކަން މިހާތަނަށް ހޯދި މައުލޫމާތުތަކުން އެނގިފައިވާ ކަމަށެވެ. މައްސަލައިގެ ތަހުގީގު ހިނގަމުންދާ ކަމަށް ފުލުހުން ބުންޏެވެ.
މަރުވެފައި އޮއްވާ ފެނުނު މީހާގެ ހަށިގަނޑު މާލެ ގެނައުމުގެ މަސައްކަތް ދަނީ ކުރަމުންނެވެ.