ގާނޫނުގައި ބުނާ ބޮޑެތި ކުށްތައް ފިޔަވައި އެހެން ކުށްތަކުގެ ތުހުމަތަށް ހައްޔަރު ކުރާ މީހުން، 15 ދުވަހަށްވުރެ އިތުރަށް ބަންދު ކުރުމަކީ ގާނޫނު ދަންނަ ކަމެއް ނޫން ކަމަށް ހައިކޯޓުން ބުނެފި އެވެ.
ހައިކޯޓުން މިހެން ބުނެފައިވަނީ މިއަދު އޮންލައިންކޮށް ކުރިއަށް ދިޔަ ޝަރީއަތެއްގައި ނިންމާފައިވާ ނިންމުމެއްގަ އެވެ. މި ނިންމުމަކީ ލޯބިވެރިޔާއާ މާރާމާރީ ހިންގި މީހަކު ހައްޔަރުކޮށް ކުރިމިނަލް ކޯޓަށް ހާޒިރު ކުރުމުން ފުރަތަމަ 10 ދުވަހުގެ ބަންދު ޖެހުމަށްފަހު އެ މުއްދަތު ހަމަވުމުން އިތުރު 15 ދުވަހަށް ބަންދު ޖެހި މައްސަލައެކެވެ.
ކުރިމިނަލް ކޯޓުން އޭނާގެ ބަންދު އިތުރުކޮށްފައިވަނީ ގާނޫނާ ހިލާފަށް ކަމަށް ބުނެ ޕްރޮސިކިއުޓާ ޖެނަރަލްގެ އޮފީހާ ދެކޮޅަށް ހައިކޯޓަށް އެމީހާ ހުށަހެޅި މައްސަލާގައި އިއްވި ހުކުމްގައިވާ ގޮތުން ކުށެއްގެ ތުހުމަތުގައި މީހަކު 15 ދުވަހަށް ބަންދުކޮށް އެ މުއްދަތު ހަމަވުމުން ދެން ބަންދުގެ މުއްދަތު އިތުރު ކުރެވޭނީ ޖިނާއީ އިޖުރާއަތުގެ ގާނޫނުގައި ބަޔާން ކުރާ ބޮޑު ކުށެއްގެ ތުހުމަތު ކުރެވޭނަމަ ކަމަށް ހައިކޯޓުން މީގެކުރިން ނިންމާފައިވާ ނިންމުމެއްގައި ކަނޑައަޅުއްވާފައިވާ ކަމަށެވެ. އެއީ 2018 ވަނަ އަހަރުގެ ނިންމުމެކެވެ.
ޖިނާއީ އިޖުރާއަތުގެ ގާނޫނުގައި ފަނޑިޔާރަށް ލިބިދޭ އިހްތިޔާރީ ބާރުގެ ދަށުން ކުށެއްގެ ތުހުމަތުގައިވާ މީހަކު ބަންދުގައި ބެހެއްޓޭނެ އެންމެ ދިގު މުއްދަތަކީ 15 ދުވަސް ކަމަށް ވެސް ބަޔާންކޮށްފައިވާ ކަމަށް ހުކުމްގައިވެ އެވެ.
އެހެންކަމުން، ބަންދަށް 15 ދުވަހަށް އިތުރަށް ދެވޭ މުއްދަތަކީ ޖިނާއީ އިޖުރާއަތު ދަންނަ ދަންނަ ކަމެއް ނޫން ކަމަށާއި އެކަމުގައި ގާނޫނު ހުރީ ހަނު ކަމަށެވެ. ވަކިބާވަތެއްގެ މައްސަލަތަކެއްގައި ބަންދުގެ މުއްދަތު 15 ދުވަހަށްވުރެ އިތުރުކުރެވޭކަމަށް ބަޔާންކުރުމަށްފަހު އަނެއް ބާވަތުގެ މައްސަލަތަކާމެދު ގާނޫނު އެއްޗެއް ނުބުނެ ހުރުމުގެ މަހުފޫމެއް ކަމުގައި ބެލެވެނީ ކުދި ކުށްތަކުގެ ތުހުމަތުވާ މީހުން ތަހުގީގު މަރުހަލާގައި 15 ދުވަހަށް އިތުރަށް ބަންދު ނުކުރެވޭނެ ކަމަށް ކަމަށެވެ.
ހުކުމްގައި ބުނީ ގާނުގައި އެ ވާހަކަ ނުލިޔެ ދޫކޮށްލެވިފައި އެވަނީ ހަނދާން ނެތިގެން ނުވަތަ އޮޅިގެންކަމުގައި ނުބެލެވޭނެ ކަމަށާއި ގާނޫނު އަސާސީ އާއި ގާނޫނުތަކުގެ ވެސް ރޫހަކީ ޝަރީއަތުން ހުކުމެއް ކޮށްފައިނުވާ މީހުން ވާނުވާއެއް ނޭނގޭ ގޮތަށް ގިނަ ދުވަސްތަކެއްވަންދެން ބަންދުގައި ނުބެހެއްޓުން ކަމަށެވެ.
ކުށުގެ ތުހުމަތުގައި ބަންދު ކުރެވޭ މީހުންގެ މައްސަލަތައް އަވަހަށް ނިންމައި ގޮތްތަކެއް ކަނޑައެެޅުމަކީ ގާނޫނު އަސާސީ އާއި ޖިނާއީ އިޖުރާއަތުގެ ގާނޫނުގެ ވެސް ރޫހު ކަމަށް ހުކުމްގައި ފާހަގަކުރި އެވެ. އަދި، އެ މަގުސަދު ހާސިލް ކުރުމަށްޓަކައި ގާނޫނުގައި ތަހުގީގު އިދާރާތަކާއި ކޯޓުތަކަށް ވަކި މުއްދަތުތަކެއް ކަނޑައަޅާފައިވާކަން ވެސް ހުކުމްގައި ފާހަގަކޮށްފައިވެ އެވެ.
އެހެންކަމުން ހައިކޯޓުން ނިންމީ، މި މައްސަލާގައި ކުރިމިނަލް ކޯޓުން އެމީހާގެ ބަންދު އިތުރުކޮށްފައިވަނީ ގާނޫނާ ހިލާފަށް ކަމަށެވެ. ހުކުމްގައި ބުނި ގޮތުގައި ފުރަތަމަ 10 ދުވަހުގެ ބަންދުގެ މުއްދަތު ހަމަވުމުން ދެން އިތުރު ކުރަން ނެރުނު އަމުރު ނެރެވުނީހީ ފަސް ދުވަހަށް ބަންދު ކުރާ ގޮތަށް ކަމަށެވެ. މިހާރު ބަންދުގެ ދެ އަމުރު ނެރެފައި އޮތް ގޮތުން އޭނާ ބަންދުގައި 25 ދުވަހު ހުންނަން ޖެހުމަކީ ގާނޫނާ ހިލާފުވުން ކަމަށެވެ.
މި ހުކުމް އިއްވާފައިވަނީ ރިޔާސަތުގައި ފަނޑިޔާރު އަލީ ސަމީރު އިންނަވައިގެންނެވެ. ދެން ބެންޗުގައި ތިއްބެވީ ފަނޑިޔާރު ޝުއައިބު ހުސެއިން އާއި ފަނޑިޔާރު އަބްދުއްރައޫފް އިބްރާހިމެވެ.